11 March, 2018 11:38:47 AM


ഏറ്റുമാനൂര്‍ ക്ഷേത്രത്തില്‍ വീണ്ടും ഉത്സവം? സത്യമെന്തന്നറിയാതെ ഭക്തജനങ്ങള്‍

വാര്‍ത്തകള്‍ തെറ്റെന്ന് അഡ്മിനിസ്ട്രേറ്റീവ് ഓഫീസര്‍




ഏറ്റുമാനൂര്‍: മഹാദേവക്ഷേത്രത്തില്‍ വീണ്ടും ഉത്സവം നടക്കുന്നതായ വാര്‍ത്തകള്‍ സമൂഹമാധ്യമങ്ങളില്‍ വൈറലാവുന്നു. കഴിഞ്ഞ ഫെബ്രുവരി 16ന് കൊടിയേറി 25ന് ആറാട്ടോടെ സമാപിച്ച ഉത്സവത്തിനിടെയുണ്ടായ അനിഷ്ടസംഭവങ്ങളെ തുടര്‍ന്ന് ഉത്സവം വീണ്ടും നടത്തുന്നുവെന്ന പ്രചരണമാണ് കൊഴുക്കുന്നത്. ഉടന്‍ നടക്കുന്ന ദേവപ്രശ്നത്തെ തുടര്‍ന്ന് അന്തിമതീരുമാനം ഉണ്ടാവുമെന്നും വ്യക്തമാക്കുന്ന സന്ദേശങ്ങളാണ് പ്രചരിക്കുന്നത്. 

ഇതിനിടെ പേരൂര്‍ പൂവത്തുംമൂട്ടില്‍ ആറാട്ടിനുശേഷം ഏറ്റുമാനൂരപ്പന്‍ തിരികെ പോന്നില്ലെന്നും ഭഗവാന്‍റെ സാന്നിദ്ധ്യം പേരൂരില്‍ ഉണ്ടെന്നുമുള്ള പ്രചരണങ്ങളും വ്യാപകമായി. എന്നാല്‍ വസ്തുതകള്‍ക്ക് നിരക്കാത്ത വാര്‍ത്തകളാണ് പ്രചരിക്കുന്നതെന്നും ഉത്സവം നടത്തുക എന്ന തീരുമാനം ഇല്ലെന്നും ക്ഷേത്രം അഡ്മിസ്ട്രേറ്റീവ് ഓഫീസര്‍ എച്ച്.കൃഷ്ണകുമാര്‍ പറഞ്ഞു. 




ആറാട്ട് ദിനത്തില്‍ വൈകിട്ട് ആറാട്ട് കടവിലും വെളുപ്പിനെ ക്ഷേത്ര ഗോപുരത്തിലും ആന പിണങ്ങിയിരുന്നു. ക്ഷേത്രഗോപുരത്തില്‍ ആന ഇടഞ്ഞതിനെതുടര്‍ന്ന് ആറാട്ട് എതിരേല്‍പിന് അകമ്പടി ആനകളില്ലാതെ വന്നു. ഇതേ ദിവസം ഉണ്ടായ അഗ്നിബാധയും ഉത്സവപരിപാടികളില്‍ ഉണ്ടായ പോരായ്മകളും ചൂണ്ടികാട്ടി ദേവപ്രശ്നം ആവശ്യപ്പെട്ട് വിവിധ ഹൈന്ദവസംഘടനകള്‍ രംഗത്ത് വന്നിരുന്നു. സംഭവത്തില്‍ തന്ത്രിയുടെ സമ്മതത്തോടെ ഒറ്റരാശിയും ആവശ്യമെങ്കില്‍ ദേവപ്രശ്നവും നടത്തുമെന്ന് ക്ഷേത്ര ഉപദേശകസമിതി സെക്രട്ടറി കെ.എന്‍.ശ്രീകുമാറും വ്യക്തമാക്കിയിരുന്നു.  ഇതിനു പിന്നാലെയാണ് വീണ്ടും ഉത്സവം നടക്കുന്നതായ വാര്‍ത്തകള്‍ പ്രചരിച്ചത്.



Share this News Now:
  • Google+
Like(s): 2189