13 June, 2018 01:08:12 PM


ഫേസ് ബുക്ക് ദല്ലാളായി; ജ്യോതിയുടെ കഴുത്തില്‍ രാജ്കുമാര്‍ മിന്നുകെട്ടി

ഫേസ്ബുക്കിലൂടെ കല്യാണമാലോചിച്ച ആദ്യ മലയാളി പെൺകുട്ടി ജ്യോതിയത്രേ



മലപ്പുറം: ഇന്നായിരുന്നു ജ്യോതിയുടെ കല്യാണം. കൽകിപുരി ശിവക്ഷേത്രത്തിൽ വച്ച് തമിഴ്നാട് പൊലീസിൽ ഉദ്യോ​ഗസ്ഥനായ രാജ്കുമാർ ജ്യോതിയുടെ കഴുത്തില്‍ മിന്നുകെട്ടി. രാവിലെ പത്ത് മണിക്ക് ഏറ്റവും ലളിതമായ ചടങ്ങുകളോടെ നടന്ന ഈ കല്യാണത്തിന് ഒരു വലിയ പ്രത്യേകതയുണ്ട്. 

മലപ്പുറം എലവണ്ണപ്പാറ സ്വദേശിനിയായ ജ്യോതി തനിക്കൊരു കൂട്ട് വേണമെന്ന് ആദ്യം പറഞ്ഞത് ഫേസ്ബുക്കിനോടാണ്. ജാതിയോ മതമോ പ്രശ്നമല്ലെന്ന് പറഞ്ഞ്,  കഴിഞ്ഞ ഏപ്രിൽ മാസത്തിൽ ജ്യോതി ഫേസ്ബുക്കിലൊരു പോസ്റ്റിട്ടു. ''എന്റെ കല്യാണം കഴിഞ്ഞിട്ടില്ല. സുഹൃത്തുക്കളുടെ അറിവിൽ ഉണ്ടെങ്കിൽ അറിയിക്കുക. ഡിമാന്റുകൾ ഇല്ല, ജാതി പ്രശ്നമല്ല, എന്റെ അച്ഛനും അമ്മയും ജീവിച്ചിരിപ്പില്ല. ഞാൻ ഫാഷൻ ഡിസൈനിം​ഗ് പഠിച്ചിട്ടുണ്ട്.''  

നൂറ് കണക്കിന് ആൾക്കാര്‍ ഇത് കണ്ട് ജ്യോതിയുടെ ഫോണിലേക്ക് വിളിച്ചു. ആ കോളുകളിലൊന്ന് പൊലീസുകാരനായ രാജ്കുമാറിന്‍റേതായിരുന്നു. തമിഴ്നാട് ബർ​ഗൂർ സ്വദേശിയാണ് രാജ്കുമാർ. ഇരുവരുടെയും ബന്ധുക്കളുടെയും സുഹൃത്തുക്കളുടെയും സാന്നിദ്ധ്യത്തിലായിരുന്നു വിവാഹം.

കൂട്ടു കൂടാൻ മാത്രമല്ല രണ്ടുപേരെ ജീവിതത്തിൽ ഒന്നിപ്പിക്കാനും ഫേസ്ബുക്കിന് കഴിയുമെന്ന് ഇതോടു കൂടി ബോധ്യമായി. ഒരുപക്ഷേ ഫേസ്ബുക്കിലൂടെ കല്യാണമാലോചിക്കുന്ന കേരളത്തിലെ ആദ്യത്തെ പെൺകുട്ടിയാണ് ജ്യോതി എന്ന് വേണമെങ്കിൽ പയാം. അച്ഛനും അമ്മയും ഇല്ലാതായ ഈ പെൺകുട്ടി സഹോദരങ്ങളുടെ പിന്തുണയോടെയാണ് ഇത്തരമൊരു കാര്യത്തിന് ഫേസ്ബുക്കിനെ കൂട്ടുപിടിച്ചത്. 

ഇതിന് മുമ്പ് രഞ്ജിഷ് മഞ്ചേരി എന്ന ചെറുപ്പക്കാരൻ തന്‍റെ പങ്കാളിയെ കണ്ടെത്തിയതും ഫേസ്ബുക്കിലൂടെയായിരുന്നു. ഇക്കാര്യത്തിൽ രഞ്ജിഷിന്‍റെ ഉപദേശവും തനിക്ക് ലഭിച്ചതായി ജ്യോതി പറയുന്നു. ഏപ്രിൽ 18 നായിരുന്നു  പ്രൊഫഷണൽ‌ ഫോട്ടോ​ഗ്രാഫറായ രഞ്ജിഷിന്‍റെ വിവാഹം.  അധ്യാപികയായ സരി​ഗമയെ ആണ് രജ്ഞിഷിന് വധുവായി ലഭിച്ചത്. 

വിവാഹ വാർത്ത അറിയിക്കുന്ന ജ്യോതിയുടെ ഫേസ്ബുക്ക് പോസ്റ്റ് മാധ്യമങ്ങൾക്കും സുഹൃത്തുക്കൾക്കും നന്ദി പറഞ്ഞ് കൊണ്ടായിരുന്നു. ഒരുപാട് കല്യാണാലോചനകൾ വന്നിട്ടും പല കാരണങ്ങൾ കൊണ്ട് നടക്കാതിരുന്ന സാഹചര്യത്തില്‍  ഫേസ്ബുക്കിനെ ആശ്രയിച്ചത് വെറുതെയായില്ല എന്ന് ജ്യോതി സന്തോഷത്തോടെ പറയുന്നു. എന്തായാലും ഫേസ്ബുക്ക് മാട്രിമോണി എന്ന ആശയം ധൈര്യമായി പരീക്ഷിക്കാം എന്ന് തെളിയിച്ചിരിക്കുകയാണ് ര‍ഞ്ജിഷിന് പിന്നാലെ ജ്യോതിയും, ര‍ഞ്ജിഷ് തന്നെയാണ് ജ്യോതിയുടെ വിവാഹ ഫോട്ടോകളും എടുത്തത്. 




Share this News Now:
  • Google+
Like(s): 233