12 July, 2018 09:29:18 AM


ഫോര്‍മാലിന്‍: അസമില്‍ പത്തു ദിവസത്തേക്ക് മത്സ്യ ഇറക്കുമതി നിരോധിച്ചു

ഫോര്‍മാലിന്‍ കൂടുതല്‍ കാണപ്പെട്ടത് ആന്ധ്രയില്‍ നിന്നുള്ള മത്സ്യത്തില്‍



ഗുവാഹത്തി: ഇറക്കുമതി ചെയ്ത മത്സ്യങ്ങളില്‍ ഫോര്‍മാലിന്‍ കണ്ടെത്തിയതിനെ തുടര്‍ന്ന് ആന്ധ്രപ്രദേശ് ഉള്‍പെടെയുള്ള സംസ്ഥാനങ്ങളില്‍ നിന്നുള്ള മത്സ്യ ഇറക്കുമതി അസം പത്തു ദിവസത്തേക്ക് നിരോധിച്ചു. ആന്ധ്രയില്‍ നിന്നാണ് അസമിലേക്ക് ഏറ്റവും കൂടുതല്‍ മീന്‍ ഇറക്കുമതി ചെയ്യുന്നത്. ഗുവാഹത്തി മാര്‍ക്കറ്റില്‍ വില്‍പ്പനക്കെത്തിയ മത്സ്യത്തിലാണ് ഫോര്‍മാലിന്റെ അംശം കണ്ടെത്തിയത്.


ഫോര്‍മാലിന്‍ അടങ്ങിയ മത്സ്യം കഴിക്കുന്നതു കൊണ്ടുണ്ടാകുന്ന ആരോഗ്യ പ്രശ്‌നങ്ങള്‍ കണക്കിലെടുത്ത് പത്തു ദിവസത്തേക്ക് മീന്‍ ഇറക്കുമതി നിരോധിച്ചിരിക്കുകയാണെന്നും ആരോഗ്യകുടുംബക്ഷേമ മന്ത്രി പിയുഷ് ഹസാരിക പറഞ്ഞു. ആരെങ്കിലും നിരോധനം ലംഘിച്ച് മത്സ്യവില്‍പ്പന നടത്തുന്നത് ശ്രദ്ധയില്‍പ്പെട്ടാല്‍ അവര്‍ക്കെതിരെ ശക്തമായ നടപടി സ്വീകരിക്കും. ഉത്തരവ് ലംഘിക്കുന്നവര്‍ക്ക് 10 ലക്ഷം രൂപ പിഴയും ഏഴ് വര്‍ഷം തടവും അനുഭവിക്കേണ്ടി വരുമെന്നും മന്ത്രി മുന്നറിയിപ്പ് നല്‍കി.


നിരോധനം മൂലമുണ്ടാകുന്ന മത്സ്യക്ഷാമം മുതലെടുത്ത് വില ഉയര്‍ത്താന്‍ പ്രാദേശിക മത്സ്യ കച്ചവടക്കാര്‍ ശ്രമിക്കരുതെന്നും മന്ത്രി പറഞ്ഞു. പഴകിയ മീന്‍ ചീഞ്ഞു പോകാതെ പുതുതായി തന്നെ നിലനിര്‍ത്തുന്നതിനാണ് ഫോര്‍മാലിന്‍ ഉള്‍പ്പെടുന്ന രാസവസ്തു ഉപയോഗിക്കുന്നത്. കാന്‍സര്‍ പോലത്തെ ഭീകരമായ രോഗങ്ങള്‍ക്ക് ഫോര്‍മാലിന്‍ കാരണമാവും.



Share this News Now:
  • Google+
Like(s): 148