26 October, 2019 09:36:36 PM


ചികിത്സാപിഴവ്: മോഹനന്‍ വൈദ്യര്‍ പൊലീസില്‍ കീഴടങ്ങി; കര്‍ശന ഉപാധികളോടെ ജാമ്യത്തില്‍ വിട്ടു



കായംകുളം: ചികിത്സാപിഴവുകള്‍ സംബന്ധിച്ച വിവിധ കേസുകളില്‍ ജില്ലാ കോടതി നിര്‍ദേശപ്രകാരം മോഹനന്‍ വൈദ്യര്‍ കായംകുളം പൊലീസില്‍ കീഴടങ്ങി. അ​ന്വേഷണ ഉദ്യോഗസ്ഥന്‍ മുമ്പാകെ ഹാജരാകാനുള്ള കോടതി നിര്‍ദേശത്തെതുടര്‍ന്ന് ശനിയാഴ്ച സ്​റ്റേഷനില്‍ എത്തുകയായിരുന്നു.തെളിവെടുപ്പിനുശേഷം കായംകുളം ഒന്നാം ക്ലാസ് മജിസ്ട്രേറ്റ് കോടതിയില്‍ ഹാജരാക്കിയ ഇദ്ദേഹത്തെ കര്‍ശന ഉപാധികളോടെ ജാമ്യത്തില്‍ വിട്ടു.


ചികിത്സാ പിഴവില്‍ ഒന്നര വയസ്സുകാരി മരിച്ച സംഭവത്തില്‍ ബാലാവകാശ കമീഷന് ലഭിച്ച പരാതിയില്‍ മാരാരിക്കുളം പൊലീസ് രജിസ്​റ്റര്‍ ചെയ്ത കേസിലും സോറിയാസിസ് ചികിത്സാ പിഴവില്‍ കായംകുളം പൊലീസ് രജിസ്​റ്റര്‍ ചെയ്ത കേസിലുമാണ് മോഹനന്‍ വൈദ്യര്‍ മുന്‍കൂര്‍ജാമ്യം തേടി കോടതിയെ സമീപിച്ചത്. അറസ്​റ്റ്​ രേഖപ്പെടുത്തിയ ഇദ്ദേഹത്തെ ഞക്കനാലിലെ ചികിത്സാലയത്തില്‍ എത്തിച്ച്‌ തെളിവെടുത്തു. തുടര്‍ന്നാണ്​ കായംകുളം ഒന്നാം ക്ലാസ് മജിസ്ട്രേറ്റ് കോടതിയില്‍ ഹാജരാക്കിയത്​.


ആഴ്ചയില്‍ ഒരു ദിവസം അന്വേഷണ ഉദ്യോഗസ്ഥന്‍ മുമ്പാകെ ഹാജരാകണമെന്നും അന്വേഷണവുമായി സഹകരിക്കണമെന്നുമുള്ള ഉപാധികളോടെയാണ്​ ജാമ്യം അനുവദിച്ചത്​. അനധികൃത ചികിത്സ നടത്തുന്നില്ലെന്ന് ആരോഗ്യവകുപ്പും ജില്ല മെഡിക്കല്‍ ഓഫിസറും ഉറപ്പുവരുത്തണമെന്നും നിര്‍ദേശിച്ചിട്ടുണ്ട്. കൃഷ്ണപുരം ഞക്കനാലില്‍ പ്രവര്‍ത്തിച്ചിരുന്ന സ്ഥാപനം പരാതി വ്യാപകമായതോടെ പഞ്ചായത്ത് അധികൃതര്‍ അടച്ചുപൂട്ടി സീല്‍ ചെയ്തിരുന്നു.



Share this News Now:
  • Mail
  • Whatsapp whatsapp
Like(s): 5.9K