09 May, 2020 12:09:51 AM
കൊല്ലം മൈനാഗപ്പള്ളി സ്വദേശി റിയാദിൽ കോവിഡ് ബാധിച്ച് മരിച്ചു
റിയാദ്: കോവിഡ് ബാധിച്ച് റിയാദിൽ ആശുപത്രിയിൽ ചികിത്സയിലായിരുന്ന മലയാളി റിയാദിൽ മരിച്ചു. കൊല്ലം മൈനാഗപ്പള്ളി സ്വദേശി കടപ്പതുണ്ടില് ശരീഫ് ഇബ്രാഹീം കുട്ടി (43) ശുമൈസി ആശുപത്രിയിൽ വെള്ളിയാഴ്ച വൈകീട്ടാണ് മരിച്ചത്. റിയാദ് അസീസിയയില് താമസിച്ചിരുന്ന ശരീഫ് അതീഖയിലെ പച്ചക്കറിക്കടയില് ജീവനക്കാരനായിരുന്നു.
മൂന്നാഴ്ച മുമ്പാണ് ന്യൂമോണിയ ബാധിച്ച് ശുമൈസി ആശുപത്രിയില് പ്രവേശിപ്പിച്ചത്. തീവ്രപരിചരണ വിഭാഗത്തിൽ വെന്റിലേറ്ററിൽ കഴിയുകയായിരുന്നു. സ്രവ പരിശോധനയിൽ കോവിഡ് 19 സ്ഥിരീകരിക്കുകയായിരുന്നു. ശരീഫയാണ് മാതാവ്. ഭാര്യ: സജ്ന. 10ാം ക്ലാസ് വിദ്യാര്ഥിനി ജാസ്മിന് ശരീഫ്, ആറാം ക്ലാസ് വിദ്യാര്ഥി മുഹമ്മദ് ഷാന് എന്നിവര് മക്കളാണ്. ഇതോടെ സൗദിയില് കോവിഡ് ബാധിച്ച് മരിച്ച മലയാളികളുടെ എണ്ണം എട്ടായി.