09 December, 2019 02:54:40 PM
ശബരിമലയിലേക്ക് പനിനീര് വേണ്ട; ഇരുമുടിക്കെട്ടില് പ്ലാസ്റ്റിക് വസ്തുക്കള് ഒഴിവാക്കണം - തന്ത്രി കണ്ഠരര് മഹേഷ് മോഹനര്
പത്തനംതിട്ട : ശബരിമലയിലേക്ക് പനിനീര് കൊണ്ടുവരേണ്ടെന്ന് തന്ത്രി കണ്ഠരര് മഹേഷ് മോഹനര്. പനിനീര് ക്ഷേത്രത്തിലേക്ക് സ്വീകരിക്കാറില്ലെന്നും ഇരുമുടിക്കെട്ടില് പ്ലാസ്റ്റിക് കൊണ്ടുള്ള വസ്തുക്കള് ഒഴിവാക്കണമെന്നും തന്ത്രി പറഞ്ഞു. സന്നിദാനം പ്ലാസ്റ്റിക് മുക്തമാക്കുന്നതിന്റെ തുടക്കം ഇരുമുടിക്കെട്ടില് നിന്നാകട്ടെയെന്നും തന്ത്രി ഓര്മ്മപ്പെടുത്തി.
ശബരിമലയെ വൃത്തിയായി സൂക്ഷിക്കേണ്ടത് ഓരോ വിശ്വാസിയുടേയും കടമയാണ്. ഇരുമുടിക്കെട്ടിനകത്ത് പ്ലാസ്റ്റിക് പൊതിയില് അവിലും മലരും എത്തിക്കുന്നത് ഒഴിവാക്കണം. പനിനീര് കൊണ്ടുവരേണ്ടെന്നും അവയില് രാസവസ്തുക്കളുണ്ടെന്നും തന്ത്രി പറഞ്ഞു.
പുണ്യം പൂങ്കാവനം പദ്ധതിയിലൂടെ ശുചീകരണം വലിയ രീതിയില് നടക്കുന്നുണ്ടെങ്കിലും കൂടുതല് ബോധവല്ക്കരണം ആവശ്യമാണ്. കെട്ടുനിറ നടക്കുന്ന ക്ഷേത്രങ്ങളില്ത്തന്നെ ഇവ നടക്കണം. ഗുരുസ്വാമിമാര് പ്ലാസ്റ്റിക് ഒഴിവാക്കാന് പ്രത്യേകം ശ്രദ്ധിക്കണമെന്നും തന്ത്രി പറഞ്ഞു. സന്നിധാനത്ത് വിരി വെക്കുന്ന സ്ഥലങ്ങളില് പ്ലാസ്റ്റിക് തിരികെ കൊണ്ടുപോകാന് തുണി സഞ്ചിയും വിതരണം ചെയ്യുന്നുണ്ട്.