07 November, 2016 03:54:25 PM
ശബരിമല തീര്ഥാടനം : വാര്ഷിക തീര്ത്ഥാടനത്തില് ലോകത്ത് രണ്ടാം സ്ഥാനത്ത്
ഏറ്റവും കൂടുതല് ഭക്തര് സന്ദര്ശനം നടത്തുന്ന തീര്ത്ഥാടന കേന്ദ്രങ്ങളില് ഒന്നാണ് ശബരിമല. കോടിക്കണക്കിന് ഭക്തര് ഇവിടെ ഓരോ വര്ഷവും എത്തുന്നു. മെക്കയിലെ ഹജ്ജ് കഴിഞ്ഞാല് വാര്ഷിക തീര്ത്ഥാടനത്തില് ലോകത്ത് രണ്ടാം സ്ഥാനത്താണ് ശബരിമല തീര്ഥാടനം. അയ്യപ്പന് (ധര്മ്മശാസ്താവ്) ആണ് ഈ ക്ഷേത്രത്തിലെ പ്രതിഷ്ഠ. കഴിഞ്ഞ വര്ഷം നവംബര് മുതല് ജനുവരി വരെയുള്ള തീര്ത്ഥാടനകാലത്ത് ഏകദേശം അഞ്ചു കോടി ഭക്തര് ശബരിമല സന്ദര്ശിച്ചു എന്നാണ് കണക്കാക്കുന്നത്.
പരമശിവനും വിഷ്ണുവിനും ജനിച്ച മകനാണ് ശ്രീ അയ്യപ്പന്. ഭസ്മാസുരനെ വധിക്കുന്നതിനായി മോഹിനി രൂപം പൂണ്ട വിഷ്ണുവില് ശിവന് അനുരക്തനായി.അങ്ങനെ ശ്രീ അയ്യപ്പന് ഭൂജാതനായി. പിന്ഗാമിയെ ലഭിക്കാനായി പ്രാര്ത്ഥന നടത്തിയിരുന്ന പന്തളം രാജാവ് വേട്ടയ്ക്കായി വരാറുള്ള കാട്ടില് ശിവനും വിഷ്ണുവും ആ സുന്ദരബാലനെ ഉപേക്ഷിച്ചു .പന്തളം രാജാവ് ആ കുട്ടിയെ സ്വീകരിക്കുകയും നല്ല ഒരു പോരാളിയും ജ്ഞാനിയുമായി വളര്ത്തുകയും ചെയ്തു.
മണ്ഡലപൂജയും, മകരവിളക്കും ആണ് ശബരിമല തീര്ത്ഥാടനത്തിലെ പ്രധാന പൂജകള്. ഇതു കൂടതെ എല്ലാ മലയാള മാസത്തിലും ആദ്യത്തെ അഞ്ചു ദിവസവും വിഷുവിനുമാണ് ക്ഷേത്രം തുറക്കുന്നത്. വര്ഷത്തിന്റെ ബാക്കി ദിവസങ്ങളില് ക്ഷേത്രം അടയ്ക്കും.
ശബരിമല തീര്ത്ഥാടന സമയത്ത് പാലിക്കേണ്ട ചില ആചാരങ്ങളുണ്ട്. ഈ സമയത്ത് മത്സ്യമാംസാഹാരങ്ങള് കഴിക്കാതിരിക്കുകയും ബ്രഹ്മചര്യം പാലിക്കുകയും വേണം. തീര്ത്ഥാടകര് നിര്ബന്ധമായും 41 ദിവസത്തെ വ്രതം അനുഷ്ഠിക്കണം. ഈ സമയത്ത് രതിയില് നിന്ന് വിട്ടു നില്ക്കുകയും മത്സ്യമാംസാഹാരങ്ങള് വര്ജ്ജിക്കുകയും വേണം. ശരീരശുദ്ധി പാലിക്കുകയും കറുത്ത വസ്ത്രങ്ങള് ധരിക്കുകയും വേണം. ഇരുമുടിക്കെട്ടുമായി മാത്രമെ പതിനെട്ടാം പടി വഴി ക്ഷേത്രത്തില് എത്തിച്ചേരാനാവൂ.
ക്ഷേത്രത്തിന്റെ നിയന്ത്രണമുള്ള തിരുവിതാംകൂര് ദേവസ്വം ബോര്ഡ് ഇവിടെ കുറഞ്ഞ ചെലവില് താമസ സൌകര്യം ഒരുക്കിയിട്ടുണ്ട്. പക്ഷെ തീര്ത്ഥാടന സമയത്തെ തിരക്കുമൂലം താമസ സൌകര്യം ലഭിക്കാന് ബുദ്ധിമുട്ട് വരാം. പ്രധാന തീര്ത്ഥാടന സമയം:നവമ്പര് മുതല് ജനുവരി വരെ.