03 November, 2019 08:58:59 PM
മാവോയിസ്റ്റ് ഭീഷണി: മുഖ്യമന്ത്രിയുടെയും മന്ത്രിമാരുടെയും സുരക്ഷ വര്‍ധിപ്പിച്ചു; ജനങ്ങള്‍ കൂടുതല്‍ ബുദ്ധിമുട്ടിലേക്ക്
തിരുവനന്തപുരം: മാവോയിസ്റ്റ് ഭീഷണിയുടെ പശ്ചാത്തലത്തില്‍ മുഖ്യമന്ത്രി പിണറായി വിജയന്‍റെയും മന്ത്രിമാരുടെയും സുരക്ഷ വര്‍ധിപ്പിച്ചു. ഇപ്പോള്‍ തന്നെ ഇസഡ് കാറ്റഗറിയില്‍ കനത്ത സുരക്ഷാ വലയത്തിലുള്ള മുഖ്യമന്ത്രിയുടെ സുരക്ഷ വര്‍ധിപ്പിച്ചതോടെ യാത്രയിലടക്കം ജനങ്ങള്‍ കൂടുതല്‍ ബുദ്ധിമുട്ടുന്ന സാഹചര്യമുണ്ടാകും. മുഖ്യമന്ത്രി പിണറായി വിജയനും ജില്ലയിലെ അഞ്ച് പൊലീസ് സ്‌റ്റേഷനുകള്‍ക്കും മാവോയിസ്റ്റ് ഭീഷണിയുള്ളതായി രഹസ്യാന്വേഷണവിഭാഗം അറിയിച്ചിരുന്നു.
അട്ടപ്പാടിയില്‍ മാവോയിസ്റ്റുകള്‍ കൊല്ലപ്പെട്ടതിന് പിന്നാലെയാണ് ഭീഷണി ഉയര്‍ന്നത്. മലയോരമേഖലയിലെ കോടഞ്ചേരി, താമരശ്ശേരി, കൂരാച്ചുണ്ട്, പെരുവണ്ണാമൂവി, തൊട്ടില്‍പ്പാലം സ്റ്റേഷനുകള്‍ക്കാണ് ഭീഷണി. അതേസമയം, വയനാടിലെ മുഴുവന്‍ പൊലീസ് സ്റ്റേഷനുകളിലും ജാഗ്രത പുലര്‍ത്തണമെന്നും ഡി.ജി.പി നിര്‍ദേശിച്ചിട്ടുണ്ട്. പ്രദേശങ്ങളില്‍ തണ്ടര്‍ബോള്‍ട്ട് സംഘം എത്തിയിട്ടുണ്ട്. രാത്രികാലങ്ങളില്‍ പരിശോധന ശക്തമാക്കും.
മാവോയിസ്റ്റ് ഭീഷണിയുള്ള ജില്ലകളിലെത്തുമ്പോള്‍ സുരക്ഷ കര്‍ശനമാക്കും. പൊതുപരിപാടികള്‍, യാത്രകള്‍, സന്ദര്‍ശനങ്ങള്‍ എന്നിവയ്ക്കെല്ലാം സുരക്ഷാ മാനദണ്ഡങ്ങള്‍ ഏര്‍പ്പെടുത്തി. കൂടാതെ സെക്രട്ടറിയേറ്റിലെ ഓഫിസിലേയും ഔദ്യോഗിക വസതിയായ ക്ലിഫ് ഹൗസിലേയും സുരക്ഷാ ക്രമീകരണങ്ങളും കൂട്ടി. മുഖ്യമന്ത്രിയെ കൂടാതെ മന്ത്രിമാരുടെ സുരക്ഷയും വര്‍ധിപ്പിച്ചു. ഇവരും മാവോയിസ്റ്റ് ഭീഷണി നേരിടുന്ന ജില്ലകള്‍ സന്ദര്‍ശിക്കുമ്പോള്‍ കര്‍ശന സുരക്ഷാ ക്രമീകരണങ്ങള്‍ ഏര്‍പ്പെടുത്തണമെന്ന ഇന്‍റലിജന്‍സ് റിപ്പോര്‍ട്ടുകളുടെ അടിസ്ഥാനത്തിലാണു നടപടി.
മന്ത്രിമാരായ എ.കെ ബാലന്‍, ഡോ.കെ.ടി ജലീല്‍ എന്നിവര്‍ക്ക് എല്ലാ ജില്ലകളിലും കനത്ത സുരക്ഷ നല്‍കും. വാളയാര്‍ സംഭവം, മാര്‍ക്ക് ദാനം എന്നിവയടക്കമുള്ളവയിലെ പ്രതിപക്ഷ പ്രതിഷേധങ്ങളുടെ പശ്ചാത്തലത്തിലാണ് എ.കെ ബാലന്‍റെയും കെ.ടി ജലീലിന്‍റെയും സുരക്ഷ വര്‍ധിപ്പിക്കാന്‍ തീരുമാനിച്ചത്. കോഴിക്കോട് പന്തീരാങ്കാവില്‍ രണ്ട് യുവാക്കള്‍ക്കെതിരെ മാവോയിസ്റ്റ് ബന്ധം ആരോപിച്ച്‌ യു.എ.പി.എ ചുമത്തിയതില്‍ സര്‍ക്കാരിനെതിരെ പ്രതിഷേധം ശക്തമാകുന്ന സാഹചര്യത്തിലാണ് മുഖ്യമന്ത്രിക്കെതിരെ മാവോയിസ്റ്റ് ഭീഷണിയെന്ന രഹസ്യാന്വേഷണ റിപ്പോര്‍ട്ട് പുറത്ത് വരുന്നത്.
