21 April, 2026 10:35:21 AM
ട്രെയിനിന് നേരെ കല്ലേറ്; വിദ്യാര്ഥിനിക്ക് ഗുരുതരമായി പരിക്കേറ്റ സംഭവത്തില് പ്രതി പിടിയില്
കോഴിക്കോട്: ആലപ്പുഴ-കണ്ണൂർ എക്സിക്യൂട്ടീവ് എക്സ്പ്രസിന് നേരെയുള്ള കല്ലേറിൽ വിദ്യാർത്ഥിനിക്ക് ഗുരുതരമായി പരിക്കേറ്റ സംഭവത്തില് പ്രതി പിടിയില്. കടലുണ്ടി വടക്കുമ്പാട് സ്വദേശി കൃഷ്ണകുമാര് (30) ആണ് തിങ്കളാഴ്ച റെയില്വേ പൊലീസിന്റെ പിടിയിലായത്. മയക്കുമരുന്ന് ഉപയോഗിച്ച ശേഷം ഇയാൾ ട്രെയിനിന് നേരെ കല്ലെറിഞ്ഞതായി പോലീസ് പറഞ്ഞു. മാർച്ച് 30 ന് വിദ്യാർത്ഥിനി ആലുവയിലെ ഹോസ്റ്റലിൽ നിന്ന് കോഴിക്കോടുള്ള വീട്ടിലേക്ക് ട്രെയിനിൽ യാത്ര ചെയ്യുമ്പോഴാണ് സംഭവം നടന്നത്. ഫറോക്കിനും കടലുണ്ടിക്കും ഇടയിലായിരുന്നു ആക്രമണം.
കല്ലേറ് കൊണ്ട ഐശ്വര്യയുടെ താടിയെല്ലിന് ഗുരുതരമായി പരിക്കേറ്റു. ഇടതുവശത്തെ രണ്ട് പല്ലുകൾ നഷ്ടപ്പെട്ടു, ചുണ്ടിനും മുറിവേറ്റു. ചികിത്സയ്ക്കായി കോഴിക്കോടുള്ള ഒരു സ്വകാര്യ ആശുപത്രിയിൽ പ്രവേശിപ്പിച്ചു. 20 ദിവസത്തിനുശേഷവും ശരിയായി ഭക്ഷണം കഴിക്കാൻ കഴിയാതെ അവർ വീട്ടിൽ വിശ്രമിക്കുകയാണ്. ആലുവയിലെ യുസി കോളേജിലെ ബിരുദാനന്തര ബയോഇൻഫോർമാറ്റിക്സ് വിദ്യാർത്ഥിനിയായ ഐശ്വര്യയ്ക്കും സംഭവത്തെത്തുടർന്ന് പരീക്ഷ എഴുതാൻ കഴിയാതെ വന്നിരുന്നു.
