01 August, 2023 01:54:44 PM
യുവാവിനെ കെഎസ്ആര്‍ടിസി ബസില്‍ മര്‍ദിച്ച സംഭവം; കണ്ടക്ടര്‍ക്ക് സസ്‌പെന്‍ഷന്‍
തിരുവനന്തപുരം: ബന്ധുവായ വനിത സുഹ‍ൃത്തിനൊപ്പം ഇരുന്നു യാത്ര ചെയ്തതിന് യുവാവിനെ മർദ്ദിച്ച കെഎസ്ആർടിസി ബസ് കണ്ടക്ടറെ സസ്പെൻഡ് ചെയ്തു. വെള്ളറട ഡിപ്പോയിലെ സുരേഷ് കുമാറിനെയാണ് സസ്പെൻഡ് ചെയ്തത്. സുരേഷിന്‍റെ ഭാഗത്തുനിന്നുണ്ടായത് ഗുരുതരമായ ചട്ടലംഘനമെന്നാണ് കണ്ടെത്തൽ.
തിരുവനന്തപുരത്തുനിന്ന് വെള്ളറടയിലേക്കു പോയ ബസിൽ ശനിയാഴ്ച രാവിലെ 11 മണിയോടെയാണ് സംഭവം. ബാലരാമപുരം സിസിലിപുരം സ്വദേശി ഋതിക് കൃഷ്ണ(23)നാണ് ബസിൽവെച്ച് കണ്ടക്ടറുടെ മർദനമേറ്റത്. ആദ്യം ടിക്കറ്റ് മെഷീൻ ഉപയോഗിച്ച് തലയ്ക്ക് അടിക്കുകയും, പിന്നീട് അടിച്ചു തറയിലേക്ക് തള്ളിയിടുകയും ചെയ്തതായാണ് യുവാവ് പരാതിയിൽ പറയുന്നത്.
ഇരുവരും ഒരുമ്മിച്ചിരിക്കുന്നത് കണ്ട കണ്ടക്ടർ യുവാവിനോട് മാറിയിരിക്കാൻ ആവശ്യപ്പെട്ടു. എന്നാൽ ഇതിനു തയ്യാറാകാതിരുന്ന ഋതിക് കൃഷ്ണനെ കണ്ടക്ടർ അസഭ്യം പറയുകയും അക്രമിക്കുകയുമായിരുന്നു. തുടർന്ന് കണ്ടക്ടർ പൊലീസിനെ വിളിച്ചുവരുത്തി തന്നെ കൈയേറ്റം ചെയ്തെന്നാരോപിച്ച് ഋതികിനെ പൊലീസിനു കൈമാറുകയായിരുന്നു.
എന്നാൽ ബസിനുള്ളിൽ കണ്ടക്ടർ യുവാവിനെ കൈയേറ്റം ചെയ്യുന്ന ദൃശ്യം യാത്രക്കാരിലൊരാൾ പകർത്തി സാമൂഹികമാധ്യമത്തിലൂടെ പ്രചരിപ്പിച്ചതോടെ സംഭവം വിവാദമായി. ഇതേത്തുടർന്ന് കണ്ടക്ടർ സുരേഷ് കുമാറിനെ പൊലീസ് അറസ്റ്റ് ചെയ്തു. പിന്നീട് ജാമ്യത്തിൽ വിട്ടയച്ചു.
