24 September, 2020 08:08:54 PM
നടൻ തിലകൻ ഓർമ്മയായിട്ട് എട്ട് വർഷം; സാംസ്കാരിക നിലയം സ്ഥാപിക്കണമെന്ന് ആവശ്യം
ഏറ്റുമാനൂർ: മലയാള സിനിമാ ലോകത്ത് പകരക്കാരനില്ലാതെ കടന്നു പോയ മലയാളത്തിന്‍റെ മഹാനടൻ തിലകന്‍റെ പേരിൽ ഉചിതമായ ഒരു സാംസ്കാരിക കേന്ദ്രം സ്ഥാപിക്കണമെന്ന് ഇന്ത്യൻ സൊസൈറ്റി ഫോർ കൾച്ചറൽ കോ-ഓപ്പറേഷൻ ആന്‍റ് ഫ്രണ്ട്ഷിപ്പ് (ഇസ്കഫ്) സർക്കാരിനോട് അഭ്യർത്ഥിച്ചു. ഇസ്കഫ് സംഘടിപ്പിച്ച തിലകൻ അനുസ്മരണ സമ്മേളനത്തില്‍ ഇതുസംബന്ധിച്ച് പ്രമേയം പാസ്സാക്കി. തിലകൻ ഓർമ്മയായിട്ട് എട്ട് വർഷമായി. 2012 സെപ്തംബർ 24 നാണ് തിലകൻ സിനിമാ ലോകത്തോട് വിടപറയുന്നത്.
ഇസ്കഫ് കോട്ടയം ജില്ലാ കമ്മറ്റി ഏറ്റുമാനൂരിൽ സംഘടിപ്പിച്ച അനുസ്മരണ സമ്മേളനത്തിൽ സംസ്ഥാന ജനറൽ സെക്രട്ടറി അഡ്വ.പ്രശാന്ത് രാജൻ അദ്ധ്യക്ഷത വഹിച്ചു. ജില്ലാ പ്രസിഡന്‍റ് വി.വൈ. പ്രസാദ്, സെക്രട്ടറി അഡ്വ.കെ.ആർ.പ്രവീൺ, സംസ്ഥാന കൗൺസിലംഗം ബേബി ജോസഫ്, ഏറ്റുമാനൂർ മേഖലാ പ്രസിഡന്‍റ് ഇ.ആർ. പ്രകാശ്, ഐ.എ.എൽ. സംസ്ഥാന സെക്രട്ടറി അഡ്വ.കെ.ആർ.മുരളീധരൻ, വിവിധ സാംസ്കാരിക സംഘടനാ നേതാക്കളായ ടി.എസ്.അൻസാരി, അഡ്വ.പി.രാജീവ് , ലിജോയ് കുര്യൻ, കെ.വി.പുരുഷൻ, എൻ.വി. പ്രസേനൻ, ഇസ്കഫ് നേതാക്കളായ അഖിൽ വിഷ്ണു , ബിന്ദുമോൾ സ്റ്റീഫൻ, ബിന്ദു കെ.റ്റി., എം.വി.കണ്ണൻ, അഡ്വ.എ.ഷാജഹാൻ എന്നിവർ പ്രസംഗിച്ചു.
