19 November, 2022 09:14:45 PM
കൈപ്പുഴയില്‍ വീട്ടമ്മയെ വീട്ടിൽ കയറി അപമാനിക്കാൻ ശ്രമം: യുവാവ് പിടിയിൽ
കോട്ടയം: വീട്ടമ്മയെ വീട്ടിൽ കയറി മർദ്ദിക്കുകയും കൊല്ലുമെന്ന് ഭീഷണിപ്പെടുത്തുകയും ചെയ്ത യുവാവിനെ പോലീസ് അറസ്റ്റ് ചെയ്തു. കോട്ടയം കൈപ്പുഴ വില്ലേജിൽ കുടിലിൽ കവല ഭാഗത്ത് എട്ടുപാറയിൽ വീട്ടിൽ രാജേന്ദ്രൻ മകൻ അമൽ രാജിനെയാണ് (23) ഗാന്ധിനഗർ പോലീസ് അറസ്റ്റ് ചെയ്തത്. വീട്ടമ്മയെയും കുടുംബത്തെയും ഇയാൾ നിരന്തരം ശല്യം ചെയ്യുകയും വീടിന്‍റെ ജനൽ ചില്ലുകൾ തകർക്കുകയും ചെയ്തതിനെ തുടർന്ന് വീട്ടമ്മ പോലീസ് സ്റ്റേഷനിൽ പരാതി നൽകിയിരുന്നു.
ഇതിനെ തുടർന്ന് പ്രതിക്ക് വീട്ടമ്മയോടുള്ള വൈരാഗ്യം മൂലമാണ് പ്രതി വീട്ടമ്മയെ വീട്ടിൽ കയറി അക്രമിച്ചത്. കൂടാതെ ഇത് കണ്ട് തടയാൻ ശ്രമിച്ച വീട്ടമ്മയുടെ ഭർത്താവിനെ ഭീഷണിപ്പെടുത്തുകയും ചെയ്തു. പരാതിയുടെ അടിസ്ഥാനത്തിൽ സ്റ്റേഷൻ എസ്എച്ച്ഓ ഷാജി കെ, എസ്ഐ പ്രദീപ് ലാൽ, സിപിഓ മാരായ ഷാമോൻ, രാകേഷ്, സോണി തോമസ് എന്നിവർ അടങ്ങുന്ന പോലീസ് സംഘം പ്രതിയെ അറസ്റ്റ് ചെയ്തു. പിന്നീട് കേസ് രജിസ്റ്റർ ചെയ്ത് പ്രതിയെ കോടതിയിൽ ഹാജരാക്കി
