27 April, 2020 10:02:28 AM
ഇന്ത്യയില്‍ 24 മണിക്കൂറിനിടെ കോവിഡ് മൂലം പൊലിഞ്ഞത് 48 ജീവന്‍; ആകെ മരണം 872
ദില്ലി: ലോക്ക്ഡൗണ് തുടരുന്പോഴും രാജ്യത്ത് കോവിഡ് 19 കേസുകൾ വർധിക്കുന്നു. ആരോഗ്യമന്ത്രാലയം പുറത്തുവിട്ട കണക്കുകൾ പ്രകാരം കഴിഞ്ഞ 24 മണിക്കൂറിനിടെ രാജ്യത്ത് 1,396 കേസുകളാണ് റിപ്പോർട്ട് ചെയ്തത്. രാജ്യത്ത് ഇതുവരെ 27,892 പേർക്ക് രോഗം സ്ഥിരീകരിച്ചതായി ആരോഗ്യമന്ത്രാലയം അറിയിച്ചു. രാജ്യത്തിന്‍റെ വിവിധ ഭാഗങ്ങളിൽ 48 പേർ 24 മണിക്കൂറിനിടെ കോവിഡ് ബാധിച്ച് മരിച്ചു. ഇതോടെ കോവിഡ് മൂലം മരിച്ചവരുടെ എണ്ണം 872 ആയി ഉയർന്നു.
6,185 പേരാണ് രാജ്യത്ത് രോഗമുക്തി നേടിയത്. രാജ്യത്തെ 27 ജില്ലകളിലാണ് ആകെ രോഗികളുടെ 68 ശതമാനവും. മഹാരാഷ്ട്ര, ഡൽഹി, ഗുജറാത്ത്, മധ്യപ്രദേശ്, തെലുങ്കാന തുടങ്ങിയ സംസ്ഥാനങ്ങളിലാണ് തീവ്രരോഗബാധിത ജില്ലകൾ ഉൾപ്പെടുന്നത്. മഹാരാഷ്ട്രയിൽ 8,068 പേർക്കാണ് കോവിഡ് സ്ഥിരീകരിച്ചത്. 342 പേരാണ് ഇവിടെ മരിച്ചത്. രാജ്യത്ത് കൊറോണ രോഗികളുടെ എണ്ണത്തിൽ രണ്ടാമത് നിൽക്കുന്നത് ഗുജറാത്താണ്. രോഗികളുടെ എണ്ണം 3,301ലെത്തിയ ഗുജറാത്തില്‍ 151 പേരാണ് ഇതുവരെ മരിച്ചത്.
