01 March, 2023 11:21:25 PM
അണിഞ്ഞൊരുങ്ങി ബാലന്മാര്; ആറ്റുകാലില്‍ കുത്തിയോട്ടത്തിന് ഭക്തിനിര്‍ഭരമായ തുടക്കം
തിരുവനന്തപുരം : ആറ്റുകാല്‍ ദേവീ ക്ഷേത്രത്തിലെ കുത്തിയോട്ട ചടങ്ങിന് ഭക്തിനിര്‍ഭരമായ തുടക്കം. 744 കുത്തിയോട്ട ബാലന്മാരാണ് ഇന്ന് ക്ഷേത്രകുളത്തില്‍ കുളിച്ച് ഈറനണിഞ്ഞ് വരിയായി ദേവിയെ വണങ്ങി വൃതമാരംഭിച്ചത്. 6 മുതല്‍ 12 വയസ് വരെയുള്ള ബാലന്മാരാണ് ഈ അനുഷ്ഠാനത്തില്‍ പങ്കെടുക്കുന്നത്.
ദേവിയെ കാപ്പുകെട്ടി കുടിയിരുത്തിയതിന്‍റെ 3-ാം നാളിലാണ് കുത്തിയോട്ടവ്രതം തുടങ്ങുക. ഇനിയുള്ള 7 ദിവസങ്ങള്‍ കുത്തിയോട്ടബാലന്മാര്‍ ക്ഷേത്രത്തില്‍ തന്നെ താമസിക്കും. മഹിഷാസുരമര്‍ദിനി ദേവിയുടെ മുറിവേറ്റ ഭടന്മാരാണ് കുത്തിയോട്ട ബാലന്മാര് എന്നതാണ് സങ്കല്‍പ്പം. 7 വെള്ളിനാണയങ്ങള്‍ പള്ളിപ്പലകയില്‍ വെച്ച് മേല്‍ശാന്തിക്കു ദക്ഷിണ നല്‍കി അനുഗ്രഹം വാങ്ങിയാണ് കുത്തിയോട്ട അനുഷ്ഠാനത്തിലേക്ക് ബാലന്മാര് കടന്നത്.
കുത്തിയോട്ട നേര്‍ച്ചയിലൂടെ ദേവിപ്രീതി നേടാമെന്നും അതുവഴി ഉന്നതവിജയവും രോഗവിമുക്തിയും ലഭിക്കുമെന്നുമാണ് വിശ്വാസം. 7 ദിവസം കൊണ്ട് 1008 നമസ്‌കാരങ്ങള്‍ പൂര്‍ത്തിയാക്കുന്ന കുട്ടികള്‍ക്ക് ദേവിയുടെ ആശിര്‍വാദം ലഭിക്കും. 9-ാം നാള്‍ കിരീടം വച്ച് അണിഞ്ഞൊരുങ്ങി ദേവിയുടെ മുമ്പിലെത്തി ചൂരല്‍ കുത്തുന്ന ഇവര്‍ മണക്കാട് ശ്രീധര്‍മശാസ്താ ക്ഷേത്രത്തിലേയ്ക്കുള്ള ദേവിയുടെ എഴുന്നള്ളത്തിന് അകമ്പടി സേവിക്കും. അടുത്ത ദിവസം രാവിലെ ക്ഷേത്രത്തില്‍ തിരികെയെത്തി ദേവിസന്നിധിയില്‍ ചൂരല്‍ കുത്ത് മാറ്റിയ ശേഷമാണ് ബാലന്മാര് വീട്ടിലേക്കു മടങ്ങുക.
