തിരുവനന്തപുരം പൗര്‍ണമിക്കാവ് ക്ഷേത്രത്തില്‍ പ്രപഞ്ചയാഗത്തിന് മാര്‍ച്ച് 31ന് തുടക്കം കുറിക്കും

28 March, 2023 09:33:27 PM

തിരുവനന്തപുരം പൗര്‍ണമിക്കാവ് ക്ഷേത്രത്തില്‍ പ്രപഞ്ചയാഗത്തിന് മാര്‍ച്ച് 31ന് തുടക്കം കുറിക്കും

തിരുവനന്തപുരം: മഹാകാളികായാഗത്തിനുശേഷം തിരുവനന്തപുരം വെങ്ങാനൂര്‍ ചാവടിനട പൗര്‍ണമിക്കാവ് ബാല ത്രിപുര സുന്ദരി ദേവിക്ഷേത്രത്തില്‍ മറ്റൊരു മഹായാഗത്തിന് മാര്‍ച്ച് 31ന് തുടക്കം കുറിക്കും. ക്ഷേത്രത്തിലെ യാഗവേദിയില്‍ ഹിമാലയ തപസ്വിയും അഘോരിസന്യാസിയുമായ 1008 മഹാമണ്ഡലേശ്വര്‍ ശ്രീ ശ്രീ കൈലാസപുരി സ്വാമിയുടെ നേതൃത്വത്തില്‍ 251 ആചാര്യന്‍മാര്‍ കാര്‍മികത്വം വഹിക്കുന്ന പ്രപഞ്ചയാഗം ഏപ്രില്‍ 6 വരെ നീളും.

രാജ്യത്തെ 108 ക്ഷേത്രങ്ങളിലെ മണ്ണും അവിടങ്ങളിലെ തീര്‍ത്ഥവും യാഗവേദിയില്‍ പൂജിക്കും. 12008 ഇഷ്ടികകള്‍ ഉപയോഗിച്ചാണ് പ്രപഞ്ചയാഗത്തിലെ യാഗകുണ്ഡങ്ങള്‍ തയ്യാറാക്കുക. നേപ്പാളിലെ പശുപതിനാഥ് ക്ഷേത്രം, മഹാകാല ഭൈരവ ക്ഷേത്രം, ബദരീനാഥ്, ഹരിദ്വാര്‍, ശ്രീപദ്മനാഭസ്വാമി ക്ഷേത്രം, സൂര്യകാലടിമന അടക്കമുളള 108 പ്രമുഖ ക്ഷേത്രങ്ങളിലെ മുഖ്യപുരോഹിതന്മാ‍രും തന്ത്രിമാരും ഹിമാലയത്തില്‍ നിന്നെത്തുന്ന 7 ശിവയോഗി സിദ്ധന്‍മാരും പ്രമുഖ മഠങ്ങളിലെ സന്ന്യാസിമാരുമടക്കം 262 വേദശാസ്ത്രികള്‍ പണ്ഡിതര്‍ പ്രപഞ്ചയാഗത്തിന് കാര്‍മികരാകും.

1008 അമൂല്യ ഔഷധങ്ങള്‍, 7 വീതമുളള സുഗന്ധദ്രവ്യങ്ങള്‍, പട്ടുവസ്ത്രങ്ങള്‍, സ്വര്‍ണം, വെളളി ഇവയും ടണ്‍കണക്കിന് തേനും നെയ്യും ഉപയോഗിച്ചാണ് യാഗത്തില്‍ 108 അതിവിശിഷ്ട പൂജകളും ഹോമങ്ങളും നടത്തുക. ഏഴ് ദിവസം നടക്കുന്ന യാഗത്തില്‍ 64 വേദ പണ്ഡിതരുടെ വേദപാരായണവും 1008 പേര്‍ ലളിതാസഹസ്ര നാമപാരായണവും നടത്തും.

ഐഎസ്ആര്‍ഓ മുന്‍ ചെയര്‍മാന്‍ പത്മവിഭൂഷന്‍ ജി.മാധവന്‍നായരാണ് പ്രപഞ്ചയാഗം നടത്തിപ്പിന് ചുക്കാന്‍ പിടിക്കുന്നത്. യാഗദിവസങ്ങളില്‍ മുഖ്യയാഗാചാര്യന്‍ കൈലാസപുരിയെ ഭക്തര്‍ക്ക് കാണുന്നതിന് പ്രത്യേക സൌകര്യം ഒരുക്കിയിട്ടുണ്ടെന്ന് ക്ഷേത്രട്രസ്റ്റ് മുഖ്യകാര്യദര്‍ശി എം.എസ്. ഭുവനചന്ദ്രന്‍, പ്രസിഡന്‍റ് അനന്തപുരി മണികണ്ഠന്‍, സെക്രട്ടറി വെളളാര്‍ സന്തോഷ് എന്നിവര്‍ അറിയിച്ചു.