27 August, 2026 05:14:50 PM
നേപ്പാള് മിന്നല് പ്രളയം; മരണസംഖ്യ 270 ആയി, കാണാതായ 288 ഇന്ത്യക്കാരില് 33 പേര് മലയാളികള്
കാഠ്മണ്ഡു: നേപ്പാളിലെ മിന്നല് പ്രളയത്തില് 288 ഇന്ത്യക്കാരെ കാണാതായതായി വിദേശകാര്യ വക്താവ് രണ്ദീര് ജയ്സ്വാള് അറിയിച്ചു. ഇതില് 33 പേര് മലയാളികളാണ്. പശ്ചിമബംഗാളില് നിന്നുള്ള 32 പേരെയും കാണാതായിട്ടുണ്ട്. തമിഴ്നാട്ടില് നിന്നുള്ള 85 പേരെ കുറിച്ചും വിവരമില്ല. കാണാതായവരില് ഒരുസംഘം ത്രിശൂലി -1 വൈദ്യുത പദ്ധതിയുമായി സഹകരിച്ച് പ്രവര്ത്തിക്കുന്നവരാണ്. മറ്റൊരു സംഘം കൈലാസ് മാനസരോവര് തീര്ത്ഥാടനത്തിനെത്തിയ തമിഴ്നാട്ടുകാരാണ്. ഇതുകൂടാതെ വിവിധ ഇന്ത്യന് സംസ്ഥാനങ്ങളില് നിന്നുള്ള 61 പേരെയും കേരളത്തില് നിന്നുള്ള 33 പേരെയും ബന്ധപ്പെടാന് കഴിയുന്നില്ലെന്ന് വിദേശകാര്യ മന്ത്രാലയം വ്യക്താക്കി.
നേപ്പാളിലെ രാസുവ, നുവാകോട്ട്, ധാഡിങ്, ഗോര്ഖ ജില്ലകളിലാണ് പ്രളയത്തില് വന് നാശനഷ്ടമുണ്ടായിരിക്കുന്നത്. കഴിഞ്ഞദിവസം രാവിലെ 8.30ഓടെ ഭോട്ടേകോശി, ത്രിശൂലി നദികളിലാണ് വെള്ളപ്പൊക്കമുണ്ടായത്. ആശയവിനിമയത്തിനായുള്ള സംവിധാനങ്ങളെല്ലാം പൂര്ണമായും തകര്ന്ന നിലയിലാണ്. മിന്നല് പ്രളയത്തില് മരിച്ചവരുടെ എണ്ണം 270ആയി ഉയര്ന്നു.
