09 January, 2017 01:21:52 PM
കമലിന് തീവ്രവാദ സംഘടനകളുമായി ബന്ധം; രാജ്യം വിട്ടുപോകണമെന്ന് ബി.ജെ.പി
കോഴിക്കോട്: സംവിധായകൻ കമലിന് തീവ്രവാദ സംഘടനകളുമായി ബന്ധമുണ്ടെന്നും ഇന്ത്യയിൽ ജീവിക്കാൻ കഴിയില്ലെങ്കിൽ അദ്ദേഹം രാജ്യം വിട്ടുപോകണമെന്നും ബി.ജെ.പി നേതാവ് എ.എൻ രാധാകൃഷ്ണൻ. നരേന്ദ്രമോഡിയെ നരഭോജി എന്നുവിളിച്ചതാണ് കമലിന്റെ യോഗ്യത. കമല്‍ എസ്ഡിപിഐകാരന്‍ ആണ്. അതിനാലാണ് മുഖ്യമന്ത്രി പിണറായി വിജയന്‍ കമലിനെ ചലച്ചിത്ര അക്കാഡമി ചെയര്‍മാനാക്കിയതെന്നും എ എന്‍ രാധാകൃഷ്ണന്‍ വാര്‍ത്താസമ്മേളനത്തില്‍ പറഞ്ഞു. നേരത്തെ എം ടി വാസൂദേവന്‍ നായര്‍ക്കെതിരെ പറഞ്ഞവയൊന്നും പിന്‍വലിക്കുന്നില്ലെന്നും കേരളത്തിലെ ഗ്രാമങ്ങളില്‍ നിന്നും ചെ ഗുവേരയുടെ ചിത്രങ്ങള്‍ നീക്കം ചെയ്യണമെന്നും എ എന്‍ രാധാകൃഷ്ണന്‍ പറഞ്ഞു.
തിരുവനന്തപുരം അന്താരാഷ്ട്ര ചലച്ചിത്രമേളയിലെ ദേശീയഗാന വിവാദത്തോടെയാണ് കമലിനെതിരെ സംഘപരിവാര്‍ തിരിഞ്ഞത്. ദേശീയഗാനത്തിന് എ‍ഴുന്നേല്‍ക്കാത്ത ഡെലിഗേറ്റുകളെ കസ്റ്റഡിയില്‍ എടുത്ത പോലീസ് കസ്റ്റഡിയിലെടുത്ത രീതിക്കെതിരെയായിരുന്നു കമല്‍ പ്രതിഷേധിച്ചിരുന്നു. ദേശീയഗാനത്തെ കമല്‍ അപമാനിച്ചെന്നാരോപിച്ച് കൊടുങ്ങല്ലൂരിലെ കമലിന്റെ വീടിനു മുന്നില്‍ ദേശീയഗാനം ചൊല്ലി യുവമോര്‍ച്ച പ്രതിഷേധിക്കുകയും കമലിനെ രാജ്യദ്രോഹിയെന്ന് വിളിക്കുകയും ചെയ്തിരുന്നു.
