10 January, 2020 06:58:28 PM
പത്രപരസ്യം നല്‍കാന്‍ സംസ്ഥാന സർക്കാർ ജനങ്ങളുടെ പണം ഉപയോഗിച്ചത് തെറ്റ് - ഗവര്‍ണര്‍
ദില്ലി: പൗരത്വഭേദഗതി നിയമത്തിനെതിരെ പ്രമേയം പാസാക്കിയതിനു സംസ്ഥാന സർക്കാർ പത്രങ്ങളിൽ പരസ്യം നൽകിയതിനെ വിമർശിച്ച് ഗവർണർ ആരിഫ് മുഹമ്മദ് ഖാൻ. രാഷ്ട്രീയ പ്രചാരണത്തിനും പാർലമെന്‍റ് പാസാക്കിയ നിയമത്തിനെതിരെ പ്രചാരണം നടത്തുന്നതിനും പൊതുപണം വിനിയോഗിക്കുന്നതു തെറ്റാണെന്നും ഇത് ജനങ്ങളുടെ പണമാണെന്നും ഗവർണർ ചൂണ്ടിക്കാട്ടി.
ഭിന്നാഭിപ്രായം പ്രകടിപ്പിക്കാൻ എല്ലാവർക്കും അവകാശമുണ്ട്. അതിൽ പ്രശ്നമില്ല. രാഷ്ട്രീയ പാർട്ടികൾ പ്രചാരണം നടത്തുന്നതിൽ തെറ്റില്ല. പൊതുപണം ഉചിതമായി വിനിയോഗിക്കണമെന്നു മാത്രമാണ് തന്‍റെ അഭിപ്രായമെന്നും ഗവർണർ പറഞ്ഞു. നിലവിൽ സംസ്ഥാന സർക്കാർ നടപടികൾ ഭരണഘടനാ വിരുദ്ധമാണ്. സംസ്ഥാന സർക്കാരുമായി ഏറ്റുമുട്ടാനില്ലെന്നും, സർക്കാരിനെ ഉപദേശിക്കാൻ മാത്രമേ ഉള്ളൂവെന്നും ഗവർണർ വ്യക്തമാക്കി.
