04 November, 2022 01:00:24 PM
കെ.എം.ഷാജിക്ക് തിരിച്ചടി; വിജിലന്‍സ് പിടിച്ചെടുത്ത പണം തിരികെ വേണമെന്ന ഹര്‍ജി തള്ളി
കോഴിക്കോട്: കണ്ണൂരിലെ വീട്ടില്‍നിന്ന് വിജിലന്‍സ് പിടിച്ചെടുത്ത പണം തിരികെ വേണമെന്നാവശ്യപ്പെട്ടുള്ള മുസ്ലീം ലീഗ് നേതാവ് കെ.എം.ഷാജിയുടെ ഹര്‍ജി കോടതി തള്ളി. കോഴിക്കോട് വിജിലന്‍സ് കോടതിയാണ് ഹര്‍ജി തള്ളിയത്. അനധികൃത സ്വത്ത് സമ്പാദനവുമായി ബന്ധപ്പെട്ട് നടത്തിയ റെയ്ഡിലാണ് 4735500 രൂപ വിജിലന്‍സ് സംഘം പിടിച്ചെടുത്തത്. ഈ പണം തിരികെ വേണമെന്നാവശ്യപ്പെട്ടാണ് ഷാജി കോടതിയെ സമീപിച്ചത്.
തെരഞ്ഞെടുപ്പിനായി പിരിച്ചെടുത്ത പണമാണിതെന്നായിരുന്നു ഷാജിയുടെ വാദം. എന്നാല്‍ പണം തെരഞ്ഞെടുപ്പ് ഫണ്ടാണെന്ന് തെളിയിക്കുന്നതിനായി ഹാജരാക്കിയ രേഖകളില്‍ കോടതി നേരത്തെ സംശയം പ്രകടിപ്പിച്ചിരുന്നു. 20000 രൂപയുടെ രസീതില്‍ പണം പിരിക്കാന്‍ തെരഞ്ഞെടുപ്പ് കമ്മീഷന്‍റെ അനുമതിയുണ്ടോ എന്നും കോടതി ചോദിച്ചിരുന്നു. വിധിക്കെതിരെ അപ്പീല്‍ നല്‍കുമെന്ന് ഷാജി പ്രതികരിച്ചു.
