25 October, 2025 07:37:56 PM
മീനച്ചിലിൽ ബുദ്ധിമാന്ദ്യമുള്ള യുവതിയെ പീഡിപ്പിച്ച കേസിൽ അയൽവാസിക്ക് 20 വർഷം കഠിനതടവ്
പാലാ : ബുദ്ധിമാന്ദ്യമുള്ള യുവതിയെ പീഡിപ്പിച്ച കേസിൽ അയൽവാസിയായ പ്രതിക്ക് 20 വർഷം കഠിനതടവും,1 ലക്ഷം രൂപ പിഴയും വിധിച്ച് കോടതി. മീനച്ചിൽ വള്ളിച്ചിറ , വലവൂർ കരയിൽ നെല്ലിയാനിക്കാട് തെക്കേ പറന്താനത്ത് വീട്ടിൽ സജി (60)യ്ക്കാണ് 20 വർഷം കഠിന തടവും, 1,00,000/- രൂപ പിഴയും കോടതി ശിക്ഷ വിധിച്ചത്. ഈരാറ്റുപേട്ട ഫാസ്റ്റ് ട്രാക്ക് സ്പെഷ്യൽ കോടതി (POCSO) ജഡ്ജ് റോഷൻ തോമസ് ആണ് വിധി പറഞ്ഞത്,പ്രതി പിഴ അടച്ചാൽ 75,000/- രൂപ അതിജീവിതയ്ക്ക് നൽകുന്നതിനും ഉത്തരവായിട്ടുണ്ട്.
ഇന്ത്യൻ ശിക്ഷാനിയമത്തിലെ വിവിധ വകുപ്പുകൾ പ്രകാരമാണ് ശിക്ഷ വിധിച്ചത്. 2021 ഓഗസ്റ്റ് 24 മുതൽ 26 വരെയുള്ള ദിവസങ്ങളിലായിരുന്നു കേസിന് ആസ്പദമായ സംഭവം. പാലാ പോലീസ് സ്റ്റേഷൻ എസ് ഐ ആയിരുന്ന അഭിലാഷ് എം ഡി രജിസ്റ്റർ ചെയ്ത കേസിൽ പാലാ എസ് എച്ച് ഒ കെപി തോംസൺ പ്രതിയെ അറസ്റ്റ് ചെയ്തു തുടരന്വേഷണം പൂർത്തിയാക്കി കുറ്റപത്രം കോടതിയിൽ സമർപ്പിക്കുകയായിരുന്നു. പ്രോസിക്യൂഷൻ ഭാഗത്തുനിന്നും 19 സാക്ഷികളെയും 23 പ്രമാണങ്ങളും ഹാജരാക്കിയ കേസിൽ പ്രോസിക്യൂഷന് വേണ്ടി സ്പെഷ്യൽ പബ്ലിക് പ്രോസിക്യുട്ടർ അഡ്വ: ജോസ് മാത്യു തയ്യിൽ ഹാജരായി.
