07 November, 2026 12:18:39 PM
മോദി സര്‍ക്കാരിനെ പോലെ കോണ്‍ഗ്രസും; സമരം നീണ്ടാല്‍ ഞാനും കുട്ടികള്‍ക്കൊപ്പം കുത്തിയിരിക്കും- പ്രകാശ് രാജ്
കൊച്ചി: കാലടി സർവകലാശാലയിൽ സമരം നടത്തുന്ന വിദ്യാർത്ഥികൾക്ക് പൂർണ്ണ ഐക്യദാർഢ്യവുമായി പ്രശസ്ത നടൻ പ്രകാശ് രാജ്. സമരം നീളുകയാണെങ്കിൽ താനും വിദ്യാർത്ഥികൾക്കൊപ്പം സമരപ്പന്തലിൽ കുത്തിയിരിക്കുമെന്ന് അദ്ദേഹം വ്യക്തമാക്കി. ശനിയാഴ്ച രാവിലെ പതിനൊന്ന് മണിയോടെയാണ് പ്രകാശ് രാജ് കാലടിയിലെ സമരപ്പന്തലിൽ എത്തിയത്.
എന്തിനാണ് ഇവരെ കൊണ്ട് മാപ്പുപറയിക്കുന്നതെന്ന് പ്രകാശ് രാജ് ചോദിച്ചു.ചോദ്യങ്ങൾ ചോദിക്കുന്ന കുട്ടികളോട് മറുപടി പറയുന്നതിന് പകരം പ്രതികാര നടപടികൾ സ്വീകരിക്കുകയല്ല വേണ്ടതെന്ന് അദ്ദേഹം വിമർശിച്ചു. കോൺഗ്രസ് സർക്കാരും കേന്ദ്രത്തിലെ മോദി സർക്കാരിനെപ്പോലെ തന്നെയാണ് പെരുമാറുന്നതെന്നും, ഉന്നത വിദ്യാഭ്യാസ മന്ത്രി സ്വന്തം നിലവാരം കാത്തുസൂക്ഷിക്കണമെന്നും അദ്ദേഹം ആവശ്യപ്പെട്ടു. സർഗവാസനയില്ലാത്തയാളാണ് നിലവിലെ കാലടി സർവകലാശാല വൈസ് ചാൻസലറെന്നും പ്രകാശ് രാജ് ആരോപിച്ചു.
തിയേറ്റർ ആർട്‌സ് വിഭാഗത്തിലെ കേടായ ഉപകരണങ്ങൾ നന്നാക്കുക, കുടിവെള്ളം ഉൾപ്പെടെയുള്ള അടിസ്ഥാന സൗകര്യങ്ങൾ ഉറപ്പാക്കുക എന്നീ ആവശ്യങ്ങളുന്നയിച്ച് വിദ്യാർത്ഥികൾ അവതരിപ്പിച്ച നാടകത്തെ ദുർവ്യാഖ്യാനം ചെയ്താണ് അധികൃതർ കുട്ടികൾക്കെതിരെ നടപടിയെടുത്തതെന്ന് എസ്.എഫ്.ഐ ആരോപിക്കുന്നു. സസ്‌പെൻഷനിലായവർ നിരാഹാര സമരം തുടരുകയാണ്.
