26 January, 2016 04:23:58 PM
ഇതാ കുറച്ച് നാട്ടു മരുന്നുകള്‍ : പരീക്ഷിച്ചു നോക്കൂ
വായില്‍ അരുചി വന്നാല്‍ : ചുക്ക് പൊടിച്ച് ചൂടുവെള്ളത്തില്‍ കഴിക്കുക, കറിവേപ്പില മോരില്‍ അരച്ച് കലക്കി സേവിക്കുക, കരിമ്പിന്‍ നീരും ഇഞ്ചി നീരും സമം ചേര്‍ത്ത് കുടിക്കുക.
വായ്പുണ്ണിന് : ഉണക്കനെല്ലിക്ക ചവച്ചരച്ച് തിന്നുക, പാവലിന്‍റെ ഇല ഇടിച്ചു പിഴിഞ്ഞ് നീര് കവിള്‍ കൊള്ളുക, കച്ചോലത്തിന്‍റെ ഇല അരച്ച് പുരട്ടുന്നതും ജാതിക്ക അരച്ചു പുരട്ടുന്നതും നല്ലതാണ്. മുക്കുറ്റി സമൂലം അരച്ച് താറാവിന്‍റെ മുട്ടയില്‍ ചേര്‍ത്ത് വറുത്ത് കഴിക്കുക.
ഇക്കിള്‍ അകറ്റാന്‍ : തുമ്പപ്പൂ അരച്ച് മോരില്‍ ചേര്‍ത്ത് കഴിക്കുക, ഇഞ്ചിനീര് തേനില്‍ ചേര്‍ത്ത് കഴിക്കുക, വായില്‍ നിറയെ വെള്ളമൊഴിച്ച് ഒരു മിനിറ്റ് മൂക്ക് അടച്ചു പിടിക്കുക.
പല്ലിന് ബലം കിട്ടാന്‍ : വേപ്പിലക്കമ്പ് ഉപയോഗിച്ച് പല്ല് തേക്കുക, ഉപ്പ് വെള്ളം ചെറുചൂടോടെ വായില്‍ കവിള്‍ കൊള്ളുക, പേരയിലയിട്ടു വെന്ത വെള്ളം കവിള്‍ കൊള്ളുക, പഴുത്ത പ്ലാവില കൊണ്ട് പല്ല് തേക്കുക.
പല്ലിന് ദ്വാരമുണ്ടെങ്കില്‍ : വാതക്കൊടിയുടെ വേരിറക്കി വയ്ക്കുക, കുരുമുളക് വള്ളി ചുട്ട് ചൂടോടെ കടിച്ചു പിടിക്കുക, കച്ചോലവും വെളുത്തുള്ളിയും കടിച്ചു പിടിക്കുക.
മോണരോഗം : ഇഞ്ചിനീരില്‍ തേന്‍ ചേര്‍ത്ത് കവിള്‍ കൊള്ളുക.
വായനാറ്റം : ഇരട്ടിമധുരം ഇടയ്ക്കിടെ ചവയ്ക്കുക, നാരങ്ങാനീര് പനിനീരില്‍ കലക്കി കവിള്‍ കൊള്ളുക, പഴുത്ത മാവില കൊണ്ട് പല്ല് തേക്കുക.
ചെറിയ ജീരകം, ഗ്രാമ്പൂ, ഉപ്പ് എന്നിവ പൊടിച്ച് അതുകൊണ്ട് തുടര്‍ച്ചയായി പല്ല് തേച്ചാല്‍ പല്ല് തേയ്ക്കുമ്പോള്‍ ബ്രഷില്‍ ചോര പുരളുന്നത് നിലയ്ക്കും.
