07 June, 2020 03:35:45 PM
,
കാണ്‍പുർ: മാസ്ക് ധരിക്കാതെ പുറത്തിറങ്ങിയതിന് പിഴയടച്ച് ഉത്തർപ്രദേശിലെ ഉന്നത പോലീസ് ഉദ്യോഗസ്ഥൻ. കാണ്‍പുർ റേഞ്ച് ഐജി മോഹിത് അഗർവാളാണ് പുതിയ മാതൃക സൃഷ്ടിച്ചത്. മാസ്ക് ധരിക്കാതെ പുറത്തിറങ്ങിയതിന് തനിക്ക് പിഴ വിധിക്കാൻ മോഹിത് അഗർവാൾ, ബാര പോലീസ് സ്റ്റേഷൻ ഹൗസ് ഓഫീസർ രാജ്നീത് സിംഗിനോട് ആവശ്യപ്പെടുകയായിരുന്നു. ഐജിക്കു 100 രൂപ പിഴ വിധിച്ച ഹൗസ് ഓഫീസർ, പിഴ അടച്ചതിന്‍റെ ചെല്ലാനും കൈമാറി.
ബാര സ്റ്റേഷനിൽ പരിശോധനയ്ക്കായാണ് താൻ എത്തിയത്. വാഹനത്തിൽനിന്ന് ഇറങ്ങി ഓഫീസർമാരുമായി കൂടിക്കാഴ്ച നടത്തിയശേഷമാണ് മാസ്ക് ധരിച്ചിട്ടില്ലെന്നു മനസിലായത്. ഉടൻതന്നെ താൻ വാഹനത്തിൽനിന്ന് മാസ്ക് എടുത്ത് ധരിച്ചു. പിന്നീട് തനിക്കു പിഴ വിധിക്കാൻ ഹൗസ് ഓഫീസറോട് ആവശ്യപ്പെടുകയായിരുന്നെന്നും ഐജി പിടിഐയോടു പറഞ്ഞു. കോവിഡ് പ്രതിരോധത്തിന്റെ ഭാഗമായ മാസ്ക് ധരിക്കാതെ വീടിനു പുറത്തിറങ്ങിയാൽ 100 രൂപയാണ് ഉത്തർപ്രദേശിൽ പിഴയായി ഈടാക്കുന്നത്.
