15 March, 2022 02:51:34 PM
വാക്സിൻ സ്വീകരിക്കാത്ത വിദ്യാർത്ഥികൾക്ക് പരീക്ഷ എഴുതാൻ അനുമതിയില്ല
റിയാദ്: വാക്‌സിന്‍ സ്വീകരിക്കാത്ത വിദ്യാര്‍ഥികളെ സൗദി അറേബ്യയിൽ പരീക്ഷ എഴുതാന്‍ അനുവദിക്കില്ല. രണ്ടാം സെമസ്റ്റര്‍ പരീക്ഷയ്ക്കാണ് ഈ വിലക്ക്. വാക്‌സിന്‍ സ്വീകരിക്കാത്ത വിദ്യാര്‍ഥികളെ ഹാജരില്ലാത്തവരായി കണക്കാക്കാനും അവരെ സ്‌കൂളുകളില്‍ പ്രവേശിക്കുന്നത് തടയാനും അധികൃതര്‍ നിര്‍ദേശിച്ചു. ഒരു വിദ്യാര്‍ഥിയെയും സ്‌കൂളില്‍ അല്ലാതെ വേറെ എവിടെയും ഇരുന്ന് പരീക്ഷ എഴുതാന്‍ അനുവദിക്കില്ല.
ക്ലാസ് മുറികളില്‍ വിദ്യാര്‍ഥികള്‍ തമ്മിലുള്ള അകലം വേണമെന്ന നിബന്ധന എടുത്തു കളഞ്ഞു. സൗദി അറേബ്യ രാജ്യത്തെ പ്രദേശങ്ങളിലെ എല്ലാ വിദ്യാഭ്യാസ വകുപ്പുകളിലേക്കും ഇക്കാര്യം അറിയിച്ചുകൊണ്ട് സര്‍ക്കുലര്‍ പുറപ്പെടുവിച്ചു.
സ്‌കൂൾ മുറികള്‍, ക്ലാസ് മുറികള്‍, എക്‌സ്‌ട്രാ കരിക്കുലര്‍ ആക്ടിവിറ്റികള്‍ ചെയ്യുന്ന ഇടങ്ങളിലെല്ലാം വിദ്യാര്‍ഥികള്‍ തമ്മിലുള്ള സാമൂഹിക അകലം റദ്ദാക്കിയതായി പുതിയ നിര്‍ദേശത്തില്‍ സൂചിപ്പിക്കുന്നു. വിദ്യാര്‍ഥികളുടെ ഹാജര്‍ ഷെഡ്യൂള്‍ ചെയ്യുകയും ഗ്രൂപ്പുകളായി വിഭജിക്കുകയും ചെയ്യുന്ന ഫോര്‍ ടയര്‍ സംവിധാനവും റദ്ദാക്കപ്പെടും.
