15 September, 2017 09:25:34 PM
നഴ്സിംഗ് കോളജുകൾക്ക് നഴ്സിംഗ് കൗണ്‍സിലിന്‍റെ അംഗീകാരം വേണ്ട - സുപ്രീം കോടതി
ദില്ലി: രാജ്യത്തെ നഴ്സിംഗ് കോളജുകൾക്ക് അംഗീകാരം ഇല്ലാതാക്കുന്നതിനോ നൽകുന്നതിനോ ഉള്ള അധികാരം ഇന്ത്യൻ നഴ്സിംഗ് കൗണ്‍സിലിന് ഇല്ലെന്ന് സുപ്രീം കോടതി. കോളജുകൾക്കു അംഗീകാരം ഉണ്ടെന്നോ ഇല്ലെന്നോ സംബന്ധിച്ച വിവരങ്ങൾ നഴ്സിംഗ് കൗണ്‍സിൽ തങ്ങളുടെ വെബ്സൈറ്റിൽ പ്രസിദ്ധപ്പെടുത്തരുതെന്നും കോടതി നിർദേശിച്ചു. കർണാടകയിലെ മിക്ക നഴ്സിംഗ് കോളജുകൾക്കും അംഗീകാരമില്ലെന്ന നഴ്സിംഗ് കൗണ്‍സിലിന്‍റെ ഉത്തരവിനെതിരേ നൽകിയ ഹർജിയിലാണ് ജസ്റ്റീസുമാരായ രോഹിൻടണ് നരിമാൻ, സഞ്ജയ് കിഷൻ കൗൾ എന്നിവരുടെ ഉത്തരവ്.
നഴ്സിംഗ് കൗണ്‍സിലിന്‍റെ അംഗീകാരമില്ലാതെ കോളജുകൾക്കു പ്രവർത്തിക്കാനാവില്ലെന്ന കൗണ്‍സിലിന്‍റെ ഉത്തരവിനെതിരേ കർണാടക നഴ്സിംഗ് കോളജുകളുടെ അസോസിയേഷനാണ് കോടതിയെ സമീപിച്ചത്. കോളജുകൾ നടത്തുന്നതിനു അതാത് സംസ്ഥാന സർക്കാരുകളും അഫിലിയേറ്റഡ് യൂണിവേഴ്സിറ്റികളുടെയും അംഗീകാരത്തിനൊപ്പം ഇന്ത്യൻ നഴ്സിംഗ് കൗണ്‍സിലിന്‍റെ അംഗീകാരം കൂടി നേടണമെന്നായിരുന്നു കൗണ്‍സിലിന്‍റെ വാദം.
എന്നാൽ, നഴ്സിംഗ് കോളജുകൾക്ക് അംഗീകാരം നൽകാനുള്ള നിയമപരമായ അധികാരം ഇന്ത്യൻ നഴ്സിംഗ് കൗണ്‍സിലിന് ഇല്ലെന്ന് കർണാടക ഹൈക്കോടതി സിംഗിൾ ബെഞ്ച് നേരത്തെ ഉത്തരവിട്ടിരുന്നു. അതു ശരിവച്ചാണ് സുപ്രീം കോടതി ഉത്തരവ് പുറപ്പെടുവിച്ചത്. ഇതോടെ, നഴ്സിംഗ് കോഴ്സുകൾ നടത്താൻ നഴ്സിംഗ് കൗണ്‍സിലിന്‍റെ അംഗീകാരം വേണമെന്ന വാദം ഇല്ലാതായി.
