10 December, 2019 09:21:35 AM
'നായനാരുടെ കാര്‍' ഇരുമ്പുവിലയ്ക്ക്; 'കേരള സ്റ്റേറ്റ് നമ്പര്‍ 1' ആയി ഓടിയ ബെന്‍സ് ലേലത്തിനൊരുങ്ങുന്നു
ആലുവ: മുന്‍ മുഖ്യമന്ത്രി ഇ കെ നായനാരുടെ ഓര്‍മകള്‍ പേറുന്ന കാര്‍ വീണ്ടും ലേലത്തിന്. വര്‍ഷങ്ങളോളം 'കേരള സ്റ്റേറ്റ് നമ്പര്‍ 1' ആയി ഓടിയ 1998 മോഡല്‍ മെഴ്സിഡീസ് ബെന്‍സ് കാര്‍ ഇത് നാലാം വട്ടമാണ് ലേലത്തിനു വയ്ക്കുന്നത്. 1996 - 2001കാലഘട്ടത്തില്‍ നായനാര്‍ മൂന്നാം തവണ മുഖ്യമന്ത്രിയായപ്പോള്‍ മൂന്നു വര്‍ഷത്തോളം ഈ കാര്‍ ഉപയോഗിച്ചിരുന്നു.
അംബാസഡര്‍ കാര്‍ ഇഷ്ടപ്പെട്ടിരുന്ന നായനാരോട് ഹൃദ്രോഗ സംബന്ധമായ ആരോഗ്യപ്രശ്നങ്ങളെത്തുടര്‍ന്ന് അംബാസഡര്‍ മാറ്റി ബെന്‍സാക്കാന്‍ ഉപദേശിച്ചതു കോണ്‍ഗ്രസ് നേതാവ് കെ കരുണാകരനായിരുന്നു.
നായനാരുടെ പിന്‍ഗാമിയായി 2001ല്‍ മുഖ്യമന്ത്രിയായ എ കെ ആന്‍റണി പക്ഷെ ബെന്‍സ് കാര്‍ ഉപയോഗിച്ചില്ല. ഇതോടെ സംസ്ഥാന അതിഥികളായി എത്തിയ വിവിഐപികളുടെ സഞ്ചാരത്തിന് മാത്രമായി ഈ കാര്‍ ഉപയോഗിച്ചു. പക്ഷെ അറ്റകുറ്റപണികള്‍ക്കായി ലക്ഷങ്ങള്‍ ചിലവാക്കേണ്ട അവസ്ഥയായപ്പോള്‍ ബെന്‍സ് ഉപയോഗം അവസാനിപ്പിച്ചു.
തിരുവനന്തപുരത്തു നിന്ന് ആലുവയില്‍ എത്തിച്ച ബെന്‍സ് ടൂറിസം വകുപ്പില്‍ 'നായനാരുടെ കാര്‍' എന്നാണ് അറിയപ്പെടുന്നത്. കാര്‍ 7 വര്‍ഷമായി ടൂറിസം വകുപ്പിന്‍റെ അതിഥി മന്ദിരമായ ആലുവ പാലസിലെ ഗാരേജില്‍ സൂക്ഷിച്ചിരിക്കുകയാണ്.
രണ്ട് ലക്ഷം രൂപ വിലയിട്ടു ലേലം ചെയ്തിട്ടും വിറ്റു പോകാത്ത കാര്‍ ഇപ്പോള്‍ ഉപയോഗശൂന്യമായ അവസ്ഥയിലാണ്. ആദ്യം ലേലത്തിനു വച്ചപ്പോള്‍ അറ്റകുറ്റപ്പണി നടത്തി ഓടിക്കാവുന്ന സ്ഥിതിയിലായിരുന്ന കാര്‍. കഴിഞ്ഞ വര്‍ഷത്തെ വെള്ളപ്പൊക്കത്തില്‍ ചെളി കയറി എന്‍ജിന്‍ തകരാറിലായതിനാല്‍ ഓടിക്കാനാകാത്ത അവസ്ഥയായി. പൊളിച്ചു വില്‍പനക്കാരേ ഇനി കാര്‍ വാങ്ങാന്‍ സാധ്യതയുള്ളു എന്നതുകൊണ്ട് 'ഇരുമ്പുവില' കണക്കാക്കിയാകും നാലാം ലേലത്തിനു തുക നിശ്ചയിക്കുക.
