26 January, 2020 10:45:09 AM
മരണം വിതച്ച് കൊറോണ വൈറസ്: ചൈനയിൽ മരിച്ചവരുടെ എണ്ണം 56 ആയി
വുഹാൻ: ചൈനയിൽ കൊറോണ വൈറസ് ബാധിച്ചു മരിച്ചവരുടെ എണ്ണം 56 ആയി ഉയർന്നു. ഞായറാഴ്ച 15 പേരുടെ മരണം റിപ്പോർട്ട് ചെയ്തു. രാജ്യത്താകെ 688 പുതിയ കേസുകളും റിപ്പോർട്ട് ചെയ്തതായി അധികൃതർ അറിയിച്ചു. വൈറസിന്‍റെ പ്രഭവ കേന്ദ്രമായ ഹുബൈയിൽ ഞായറാഴ്ച മാത്രം 13 പേരുടെ മരണമാണ് റിപ്പോർട്ട് ചെയ്തത്.
ഇവിടെ 323 പുതിയ കേസുകളും റിപ്പോർട്ട് ചെയ്തിട്ടുണ്ട്. ഹുബൈയിൽ ഇതുവരെ 52 പേരാണ് കൊറോണ വൈറസ് ബാധിച്ച് മരിച്ചത്. ഷാൻഹായിൽ ആദ്യത്തെ മരണം ഇന്ന് റിപ്പോർട്ട് ചെയ്തു. ചൈനയിൽ ആകെ 1,975 പേർക്ക് വൈറസ് ബാധിച്ചെന്നാണ് ഔദ്യോഗിക അറിയിപ്പ്. അനൗദ്യോഗിക കണക്കു പ്രകാരം രോഗബാധയുള്ളവരുടെ എണ്ണം ഇതിലും വളരെയേറെയാണ്. ചൈനയിലെ 26 പ്രവിശ്യകളിൽ ആരോഗ്യ അടിയന്തരാവസ്ഥ പ്രഖ്യാപിച്ചു. 5.6 കോടി ജനങ്ങളുടെ യാത്രകൾ വിലക്കിക്കൊണ്ടു 18 നഗരങ്ങളിൽ നിയന്ത്രണം പ്രഖ്യാപിച്ചു.
ഹോങ്കോംഗിൽ ആരോഗ്യ അടിയന്തരാവസ്ഥ പ്രഖ്യാപിക്കുകയും വിദ്യാലയങ്ങൾക്കു രണ്ടാഴ്ചകൂടി അവധി നല്കുകയും ചെയ്തു. യൂറോപ്പിലും കൊറോണ വൈറസ് ബാധ സ്ഥിരീകരിച്ചു. ശനിയാഴ്ചയോടെ ചൈനയ്ക്കു പുറത്തു 12 രാജ്യങ്ങളിലാണ് രോഗബാധ കണ്ടത്. ഫ്രാൻസിൽ മൂന്നു പേർക്കു രോഗം കണ്ടെത്തി. ബ്രിട്ടനിൽ 14 പേരെ പരിശോധിച്ചെങ്കിലും ആരിലും രോഗബാധയില്ല. വുഹാനിൽനിന്ന് എത്തിയ മൂന്നുപേരടക്കം നാലുപേർക്ക് രോഗബാധ സ്ഥിരീകരിച്ചതായി ഓസ്ട്രേലിയ അറിയിച്ചു.
അമേരിക്കയിൽ രണ്ടുപേരിൽ രോഗം കണ്ടെത്തി. നേപ്പാളിൽ ഒരാൾക്കും മലേഷ്യയിൽ നാലു പേർക്കും രോഗം സ്ഥിരീകരിച്ചു. ഹോങ്കോംഗ്, മക്കാവു, തായ്‌‌വാൻ, ജപ്പാൻ, സിംഗപ്പൂർ, ദക്ഷിണകൊറിയ എന്നീ രാജ്യങ്ങളിലേക്കും കൊറോണ വൈറസ് രോഗം പടർ ന്നിട്ടുണ്ട്. വൈറസ് ബാധിതരെ ചികിത്സിച്ചിരുന്ന രണ്ടു ഡോക്ടർമാർ മരിച്ചു. 62 വയസുള്ള ലിയാംഗ് വുഡോംഗ് കൊറോണ വൈറസ് ബാധകൊണ്ടാണു മരിച്ചത്. ജിയാംഗ് ജിജുൻ എന്ന ഡോക്ടർ ഹൃദ്രോഗം മൂലം മരിച്ചു
