08 February, 2020 09:53:43 PM
ഭീകരാക്രമണങ്ങള്‍: ഹാഫിസ് സഈദിനെതിരായ വിധി പറയുന്നത് നീട്ടി
ലാഹോര്‍: മുംബൈ ഭീകരാക്രമണ സൂത്രധാരനും ജമാഅത്തുദ്ദഅ്വ തലവനുമായ ഹാഫിസ് സഈദ് പ്രതിയായ രണ്ട് ഭീകരാക്രമണക്കേസുകളില്‍ വിധി പറയുന്നത് നീട്ടി. ഭീകര പ്രവര്‍ത്തനത്തിന് പണം നല്‍കിയെന്ന കേസുകളാണ് സഈദിന്‍റെ അഭ്യര്‍ഥന പരിഗണിച്ച്‌ മാറ്റിയത്. ശനിയാഴ്ച വിധി പറയാനിരുന്ന കേസുകളാണ് ലാഹോര്‍ ഭീകര വിരുദ്ധ കോടതി ജഡ്ജി അര്‍ശദ് ഹുസൈന്‍ ഭുട്ട ചൊവ്വാഴ്ചത്തേക്ക് മാറ്റിയത്.
ഭീകരാക്രമണത്തിന് പണം നല്‍കിയതുമായി ബന്ധപ്പെട്ട് സഈദിനെതിരായ എല്ലാകേസുകളും ചേര്‍ത്ത് ഒന്നിച്ച്‌ വിചാരണ നടത്തി വിധി പറയണമെന്ന അപേക്ഷയാണ് കോടതി പരിഗണിച്ചത്. അപേക്ഷ പ്രോസിക്യൂഷന്‍ എതിര്‍ത്തു. അപേക്ഷയിലുള്ള വാദിഭാഗത്തിന്‍റെയും പ്രതിഭാഗത്തിന്‍റെയും നിലപാട് അറിയുന്നതിനാണ് ചൊവ്വാഴ്ചയിലേക്ക് കേസ് മാറ്റിയത്.
