12 June, 2023 01:50:02 PM
നാട്ടിലുള്ള ഭാര്യയെ നഗ്നയാക്കി മര്‍ദിച്ചു; നടപടിയെടുക്കണമെന്ന് അതിര്‍ത്തിയില്‍ നിന്നും സൈനികന്‍
ചെന്നൈ: നാട്ടിലുള്ള ഭാര്യയെ അര്‍ധനഗ്നയാക്കി ഉപദ്രവിച്ചവരെ കണ്ടെത്തണമെന്നും കുടുംബത്തിന് സംരക്ഷണം നല്‍കണമെന്നും കശ്മീരില്‍ നിന്നും വീഡിയോയിലൂടെ അപേക്ഷിച്ച് ഇന്ത്യന്‍ സൈനികന്‍. സംഭവത്തില്‍ പോലീസിന്‍റെ ഇടപെടല്‍ ആവശ്യപ്പെട്ടിരിക്കുന്ന വീഡിയോ സാമൂഹ്യമാധ്യമങ്ങളില്‍ വൈറലായി മാറുകയായിരുന്നു. സംഭവത്തില്‍ ഒരാള്‍ അറസ്റ്റിലായതായി സൈന്യം വ്യക്തമാക്കി.
കശ്മീരില്‍ നിയോഗിക്കപ്പെട്ടിരിക്കുന്ന ഹവീല്‍ദാര്‍ പ്രഭാകരനാണ് തന്റെ കുടുംബത്തിന് നീതി കിട്ടണം എന്നാവശ്യപ്പെട്ട് വീഡിയോ സന്ദേശം ഇട്ടത്. തന്റെ ഭാര്യയെ ആക്രമിച്ചയാള്‍ക്ക് എതിരേ നടപടിയെടുക്കണമെന്ന് പ്രഭാകരന്‍ തമിഴ്നാട് പോലീസ് ഉന്നതനോടാണ് ആവശ്യപ്പെട്ടത്. പ്രാദേശികമായി ഉണ്ടായ ഒരു ചെറിയ വഴക്കിന്റെ പേരില്‍ ഇയാള്‍ തന്റെ ഭാര്യയെ ആക്രമിക്കുകയും അവരെ പാതി വിവസ്ത്രയാക്കിയെന്നും സൈനികന്‍ ആരോപിക്കുന്നു. സൈനിക വേഷത്തിലാണ് പ്രഭാകരന്‍ വീഡിയോയില്‍ പ്രത്യക്ഷപ്പെട്ടത്.
വീഡിയോയ്ക്ക് പിന്നാലെ സൈന്യവും പോലീസ് വകുപ്പിനെ വിളിച്ച് അന്വേഷണത്തിന് തങ്ങളുടേതായ എല്ലാ സഹായവും നല്‍കാമെന്നും ഉറപ്പ് നല്‍കിയിരിക്കുകയാണ്. സംഭവത്തില്‍ ഒരാളെ അറസ്റ്റ് ചെയ്തു. മറ്റുള്ളവരെയും ഉടന്‍ തന്നെ അറസ്റ്റ് ചെയ്യും. സേവനത്തിന് അയച്ചിരിക്കുന്ന സൈനികരുടെ കുടുംബത്തിന്റെ സുരക്ഷയ്ക്ക് സൈന്യം വലിയ മുന്‍ഗണനയാണ് നല്‍കി വരുന്നത്.
സൈനികന്റെ കുടുംബത്തിന്റെ സുരക്ഷ ഉറപ്പാക്കാന്‍ സൈന്യം പ്രാദേശികഭരണകൂടവും സിവില്‍ പോലീസും ഉള്‍പ്പെടെയുള്ള സര്‍ക്കാര്‍ സമിതികളുമായി നിരന്തരം ബന്ധപ്പെട്ടാണ് ഇരിക്കുന്നത്. അതേസമയം സംഭവത്തില്‍ സൈനികന്റെ ഭാര്യ ആശുപത്രിയില്‍ പ്രവേശിപ്പിക്കപ്പെട്ടിട്ടും യുവതി ആക്രമിക്കപ്പെട്ടിട്ടില്ലെന്നാണ് പോലീസ് പറയുന്നത്.
