16 December, 2025 12:28:34 PM
സര്ട്ടിഫിക്കറ്റ് വിതരണത്തിനിടെ വനിതാ ഡോക്ടറുടെ മുഖത്ത് നിന്ന് ഹിജാബ് മാറ്റി നിതീഷ് കുമാർ
പട്ന: സര്ക്കാര് ചടങ്ങിനിടെ യുവതിയുടെ മുഖത്തുനിന്നും ഹിജാബ് മാറ്റാന് ശ്രമിച്ച് വീണ്ടും വിവാദത്തിന് വഴിവച്ച് ബിഹാര് മുഖ്യമന്ത്രി നിതീഷ് കുമാര്. പട്നയില് തിങ്കളാഴ്ച നടന്ന ഒരു ചടങ്ങില് സര്ട്ടിഫിക്കറ്റ് വിതരണം ചെയ്യുന്നതിനിടെയാണ് അദ്ദേഹം ഡോക്ടറുടെ ഹിജാബ് പിടിച്ച് വലിച്ചുതാഴ്ത്തിയത്. ഇതിന്റെ ദൃശ്യങ്ങള് സാമൂഹികമാധ്യമങ്ങളിലൂടെ പ്രചരിച്ചതോടെ വലിയ വിമര്ശനങ്ങളാണ് ഉയരുന്നത്.
ഹിജാബ് ഊരിമാറ്റിയ സംഭവത്തിൽ ബീഹാർ മുഖ്യമന്ത്രി നിതീഷ് കുമാർ മാപ്പുപറയണമെന്ന് പ്രതിപക്ഷം ആവശ്യപ്പെട്ടു. മുഖ്യമന്ത്രി പദത്തിൽ ഇരിക്കാൻ അർഹത ഇല്ലെന്ന് RJDയും കോൺഗ്രസും ആവശ്യപ്പെട്ടു. അദ്ദേഹത്തിന്റേത് അത്യന്തം ഹീനവും ലജ്ജാവഹവുമായ പ്രവര്ത്തിയാണെന്ന് കോണ്ഗ്രസ് അഭിപ്രായപ്പെട്ടു. നിതീഷ് കുമാര് മുഖ്യമന്ത്രി സ്ഥാനത്തുനിന്ന് രാജിവെക്കണമെന്നും കോണ്ഗ്രസ് ആവശ്യപ്പെട്ടു.
