29 September, 2026 12:55:48 PM
പോലീസ് സംഘടനകളെ പിരിച്ചുവിട്ട സര്ക്കാര് ഉത്തരവ് ഹൈക്കോടതി റദ്ദാക്കി
കൊച്ചി: സംസ്ഥാനത്തെ പൊലീസ് സംഘടനകളെ പുനഃസംഘടിപ്പിക്കാനും പിരിച്ചുവിടാനും ലക്ഷ്യമിട്ട് സർക്കാർ പുറപ്പെടുവിച്ച വിവാദ ഉത്തരവ് റദ്ദാക്കി ഹൈക്കോടതി. പൊലീസ് ഓഫീസേഴ്സ് അസോസിയേഷൻ ഉൾപ്പെടെയുള്ള സംഘടനകൾ നൽകിയ ഹർജികൾ അനുവദിച്ചുകൊണ്ടാണ് ജസ്റ്റിസ് ബെച്ചു കുര്യൻ തോമസിന്റെ സുപ്രധാന വിധി. സർക്കാരിന്റെ ഉത്തരവ് ഭരണഘടനയുടെ അനുച്ഛേദം 19(1)(സി), അനുച്ഛേദം 33 എന്നിവ ഉറപ്പുനൽകുന്ന മൗലികാവകാശങ്ങളുടെ നഗ്നമായ ലംഘനമാണെന്ന് കോടതി ചൂണ്ടിക്കാട്ടി. ഉത്തരവ് നിയമപരമായി നിലനിൽക്കില്ല എന്നും കോടതി നിരീക്ഷിച്ചു.
പൊലീസ് സംഘടനകളെ പിരിച്ചുവിട്ട് പുതിയ അഡ്ഹോക്ക് കമ്മിറ്റികൾ രൂപീകരിക്കാനുള്ള സർക്കാർ നീക്കത്തിനും കോടതി തടയിട്ടു. സംഘടനകളുടെ ഭാഗം കേൾക്കാതെയും അവരുടെ അഭിപ്രായങ്ങൾ ആരായാതെയും സർക്കാർ സ്വീകരിച്ച അച്ചടക്ക നടപടി നിലനിൽക്കില്ലെന്ന് കോടതി നിരീക്ഷിച്ചു. സർക്കാർ നേരിട്ട് അഡ്ഹോക്ക് കമ്മിറ്റികളെ നിയമിച്ചത് പൊലീസ് അസോസിയേഷനുകളുടെ സ്വതന്ത്രമായ സ്വയംഭരണാവകാശത്തിലുള്ള നേരിട്ടുള്ള കടന്നുകയറ്റമാണ്. സംഘടനകളുടെ ജനാധിപത്യ സ്വഭാവത്തെ തകർക്കുന്ന ഇത്തരം ഭരണപരമായ ഇടപെടലുകൾ അനുവദിക്കാനാവില്ലെന്ന് ചൂണ്ടിക്കാട്ടിയാണ് സർക്കാർ ഉത്തരവും അഡ്ഹോക്ക് സമിതി രൂപീകരണവും കോടതി റദ്ദാക്കിയത്. നിലവിലെ അസോസിയേഷനുകൾക്ക് തുടർന്നും പ്രവർത്തിക്കാമെന്ന കോടതി വിധി സംസ്ഥാന സർക്കാരിന് വലിയ തിരിച്ചടിയാണ്.
പൊലീസ് സംഘടനാ ക്രമീകരണത്തെ അനുകൂലിച്ച് അഡ്ഹോക് കമ്മിറ്റിയംഗം ജിആര് അജിത് നല്കിയ ഹര്ജി ഹൈക്കോടതി തള്ളി. ഹര്ജി നിലനില്ക്കില്ലെന്ന് നിരീക്ഷിച്ചാണ് ഹൈക്കോടതിയുടെ നടപടി. പൊലീസിലെ സംഘടനാ പ്രവര്ത്തനം ഭരണഘടനാ അവകാശമല്ലെന്നും സര്ക്കാരിന്റെ ഔദാര്യമാണ് എന്നുമുള്ള ജിആര് അജിത്തിന്റെ വാദം ഹൈക്കോടതി തള്ളി.
2011ലെ കേരള പൊലീസ് നിയമപ്രകാരം അംഗീകരിക്കപ്പെട്ട ഒരു സംഘടനയാണ് കേരള പൊലീസ് അ സോസിയേഷന്. അംഗീകൃത സംഘടനകളുടെ ബൈലോ സര്ക്കാര് ഉള്പ്പെടെയുള്ള ആരും ലംഘിക്കുന്നില്ലെന്ന് ഉറപ്പാക്കാന് അവയ്ക്ക് നിയമപരമായ അവകാശമുണ്ട്. ഈ സാഹചര്യത്തില് കേരള പൊലീസ് അസോസിയേഷനും കേരള പൊലീസ് ഓഫീസേഴ്സ് അസോസിയേഷനും നല്കിയ ഹര്ജികള് നിലനില്ക്കുമെന്നാണ് ഹൈക്കോടതിയുടെ നിരീക്ഷണം.
ഭണഘടനയുടെ ആര്ട്ടിക്കിള് 19(1)(സി) പ്രകാരം സംഘടന രൂപീകരിക്കാനുള്ള സ്വാതന്ത്ര്യമുണ്ട്. അതില് അംഗങ്ങള് സ്വമേധയാ അംഗീകരിച്ച ഘടനയോടെ ആ സംഘടനയുമായി മുന്നോട്ട് പോകാനുള്ള അവകാശവും ഉള്പ്പെടുന്നുവെന്നാണ് സിംഗിള് ബെഞ്ചിന്റെ നിരീക്ഷണം.
