01 October, 2023 11:06:32 AM
കടുത്തുരുത്തി നിയോജക മണ്ഡലം പ്രതിഭാസംഗമത്തിൽ സാബു ജോർജിനെ ആദരിച്ചു
വൈക്കം: കടുത്തുരുത്തി നിയോജകമണ്ഡലം പ്രതിഭാസംഗമവും എംഎല്‍എ എക്‌സലന്‍സ് അവാര്‍ഡ് ദാന ചടങ്ങും യൂണിവേഴ്‌സിറ്റി പരീക്ഷകളിലെ റാങ്ക് ജേതാക്കളെയും വിവിധ മത്സര പരീക്ഷകളില്‍ ഉന്നതവിജയം നേടിയവരെയും എസ്എസ്എല്‍സി, പ്ലസ്ടു പരീക്ഷകളില്‍ ഫുള്‍ എ പ്ലസ് നേടിയ വിദ്യാര്‍ഥികളെയും പങ്കെടുപ്പിച്ചുകൊണ്ട് കടുത്തുരുത്തിയിൽ നടന്നു.
കേരള ലോകായുക്ത ജസ്റ്റീസ് സിറിയക് ജോസഫ് സമ്മേളനം ഉദ്ഘാടനം ചെയ്തു. കോട്ടയം ജില്ലയിലെ മികച്ച അസിസ്റ്റന്റ് കൃഷി ഓഫിസർക്കുള്ള അവാർഡ് ലഭിച്ച കുറവിലങ്ങാട് കൃഷിഭവൻ അസിസ്റ്റന്റ് കൃഷി ഓഫിസർ ഒറ്റക്കണ്ടത്തിൽ സാബു ജോർജ്ജിനെ സമ്മേളനത്തിൽ ആദരിച്ചു.
കേന്ദ്ര, സംസ്ഥാന സര്‍ക്കാരുകളുടെയും വിവിധ അക്കാദമികളുടെയും അവാര്‍ഡുകളും പുരസ്‌കാരങ്ങളും നേടിയിട്ടുള്ളവരെയും ഉന്നത സാമൂഹികാംഗീകാരം നേടിയ പുത്തന്‍ പ്രതിഭകളെയും കലാ, കായിക, സാഹിത്യ രംഗങ്ങളിലെ ശ്രദ്ധേയ വ്യക്തിത്വങ്ങളെയും യോഗത്തില്‍ ആദരിച്ചു.
ജില്ലാ കളക്‌ടര്‍ വി. വിഗ്‌നേശ്വരി, മുന്‍ എക്‌സൈസ് കമ്മീഷണര്‍ ഋഷിരാജ് സിംഗ്, സിനിമാസംവിധായകനും നടനുമായ ദിലീഷ് പോത്തന്‍, സിനിമാ നിര്‍മാതാക്കളായ ലിന്‍സ്റ്റിന്‍ സ്റ്റീഫന്‍, സന്തോഷ് ടി. കുരുവിള, സിനിമ-സീരിയല്‍ താരം നീനാകുറുപ്പ്, കടുത്തുരുത്തി ബ്ലോക്ക് പഞ്ചായത്ത് പ്രസിഡന്‍റ് പി.വി. സുനില്‍, പഞ്ചായത്ത് പ്രസിഡന്‍റുമാര്‍, ജനപ്രതിനിധികള്‍ തുടങ്ങിയവര്‍ പ്രസംഗിച്ചു.
