12 June, 2020 05:55:35 PM
കോട്ടയത്ത് മൂന്നു പേര്‍ക്ക് കൂടി കോവിഡ്: 82കാരന് രോഗമുക്തി; 46 പേര്‍ ചികിത്സയില്‍
കോട്ടയം: ജില്ലയില്‍ ഇന്ന് ലഭിച്ച 155 സാമ്പിള്‍ പരിശോധനാ ഫലങ്ങളില്‍ മൂന്നെണ്ണം പോസിറ്റീവായി. സൗദി അറേബ്യയില്‍നിന്നും മെയ് 23ന് ഹൈദരാബാദ് വഴി എത്തിയ പാലാ സ്വദേശി (49), ജൂണ്‍ രണ്ടിന് കുവൈറ്റില്‍നിന്നെത്തിയ കോരുത്തോട് സ്വദേശി (30), ദോഹയില്‍നിന്നും ജൂണ്‍ അഞ്ചിന് എത്തിയ പാറത്തോട് സ്വദേശി (30) എന്നിവര്‍ക്കാണ് രോഗം സ്ഥിരീകരിച്ചത്.
കോവിഡ് ബാധിച്ച 82കാരന്‍റെ പരിശോധനാഫലം നെഗറ്റീവായി. ഈ മാസം രണ്ടിന് രോഗം സ്ഥിരീകരിച്ച ഇടയിരിക്കപ്പുഴ സ്വദേശിയാണ് രോഗമുക്തനായത്. ദുബായില്‍നിന്ന് മെയ് 17ന് വന്ന് ഹോം ക്വാറന്‍റയിനില്‍ കഴിയുമ്പോഴാണ് ഇദ്ദേഹം പരിശോധനയ്ക്ക് വിധേയനായത്.
പാലാ സ്വദേശി മെയ് 29ന് ഹൈദരാബാദില്‍ സാമ്പിള്‍ പരിശോധനയ്ക്ക് വിധേയനായിരുന്നെങ്കിലും ഫലം നെഗറ്റീവായിരുന്നു. നാട്ടിലെത്തി ചൂണ്ടച്ചേരിയിലെ ക്വാറന്‍റയിന്‍ കേന്ദ്രത്തില്‍ കഴിയുമ്പോഴാണ് വീണ്ടും സാമ്പിള്‍ ശേഖരിച്ചത്. കോരുത്തോട് സ്വദേശിയും പാറത്തോട് സ്വദേശിയും വീട്ടില്‍ ക്വാറന്‍റയിനില്‍ കഴിയുകയായിരുന്നു. ഇതോടെ രോഗം ബാധിച്ച് ചികിത്സയില്‍ കഴിയുന്ന കോട്ടയം ജില്ലക്കാരുടെ എണ്ണം 46 ആയി.
കോവിഡ് സ്ഥിരീകരിച്ച 46 പേരില്‍ 23 പേര്‍ കോട്ടയം മെഡിക്കല്‍ കോളേജ് ആശുപത്രിയിലും 22 പേര്‍ കോട്ടയം ജനറല്‍ ആശുപത്രിയിലും ഒരാള്‍ എറണാകുളം മെഡിക്കല്‍ കോളേജ് ആശുപത്രിയിലുമാണ്.
